Ni AILEEN R. RAMBAUD
Nailibron ti “Dagiti Maudi nga Aldaw ni Marcos iti Malakanyang” a sinurat ni Ric Agnes ken nairuar iti kolumna a “Kastoy, Kapid, iti Hawaii” manipud iti Pebrero 1-15, 2022 a bilang agingga iti Oktubre 16-31, 2022 a bilang ti Bannawag.
Nayalnag ti libro a napauluan iti “Dagiti Maudi nga Aldaw ni Ferdinand E. Marcos” iti La Tabacalera iti Siudad ti Laoag idi Pebrero 25 bayat ti pannakalagip ti maika-37 nga anibersario ti 1986 EDSA People Power Revolution.
Mismo a ni Ilocos Norte Gov. Matthew Marcos Manotoc, maysa kadagiti apoko ni Marcos Sr., ti nagpaay a naisangayan a sangaili iti pannakayalnag ti libro.
Nagyaman ni Manotoc iti autor, tubo ti Sarrat, Ilocos Norte ngem agnaeden iti Hawaii, iti panangiruarna iti libro a nakailanadan ti adu a lagip maipapan iti apona a lakay.
Kinuna ni Agnes nga awan panggepna a nangsurat iti serye dagiti artikulona nga immuna a rimmuar iti Bannawag no di ti mangipalgak iti kinapudno maipanggep iti daydi Presidente Marcos sakbay a pimmanaw iti Malakanyang ken bayat ti kaaddana iti Hawaii.
Nagyaman met ni Agnes iti panangipalubos kenkuana ni Col. Arturo Aruiza, ti katalek daydi Presidente Marcos, iti panangaramatna iti sumagmamano a paset ti libro daytoy a “Ferdinand E. Marcos: Malacañang to Makiki” iti panangsuratna iti “Dagiti Maudi nga Aldaw…”
Nairaman iti mismo a libro ti patarus daytoy iti Filipino babaen ken ni Dr. Editha R. Mabanag ti DepEd, Ilocos Norte Division.
Maikkan iti kopia ti nasao a libro dagiti nadumaduma a pagadalan ken biblioteka iti Ilocos Norte babaen met laeng ti tulong ti DepEd, ken dagiti dadduma pay a biblioteka iti Region 1, Region 2, ken Cordillera Administrative Region babaen ti tulong ti GUMIL Filipinas ken Bannawag, kas kinuna ni Agnes.
Premiado a mannurat, maysa pay a lisensiado a civil ken geodetic engineer ni Agnes. Nagpaay iti nadumaduma a nangato a takem iti Department of Environment and Natural Resources sakbay a nagpa-Hawaii idi 1986 a nagpaayanna iti Housing and Urban Development iti babaen ti City and County ti Honolulu agingga iti panagretirona. Maysa ita a lisensiado a General Building Contractor iti nasao nga estado.
Iti pakauna ni Atty. Edito Alberto G. Balintona, kailian ti autor ken nagpaay nga ama ti ili a Sarrat, Ilocos Norte manipud idi 2007 agingga idi 2016, kinunana a gapu iti sinurat ni Apo Agnes, ad-addan a napatalgedan nga umno unay ti kaadda ti estatua daydi Presidente Marcos iti plasa ti Sarrat, ti umuna unay nga estatua ti pimmusay a presidente nga inyinstolar ti maysa a gobierno lokal iti sapasap a pagilian idi Septiembre 13, 2015. (Bannawag, Abril 1-15, 2023 a bilang)
