Lima a Daniw ni HONOR BLANCO CABIE
1
maktang teltelko a mangtangad 'diay
panaglinged dua a planeta* 'ti
likud ti bulan – ay! 'tay linglingay
5 a Daniw
ilemmengda ita a rabii.
panagin-innungngoda't ngato ta
mata 'diay bulan ta masigsigkat,
ngem dina met ngarud maatipa
ida – awan met 'tay buneng a pangtagbat.
kayatko met koma a makita 'diay
panagginginnusugosda iti
likud 'diay bulan a malinglingay:
adda ngata mangngegko a kari?
ay! venus no ni jupiter met la --
siak la koman' nakatnagan rikna.
**segun iti Space.com 0.52 degrees
panagaddayo da venus ken jupiter
idi marso 1.
addaan rayray ti jupiter iti magnitude
-2.1 idinto a ni venus addaan darang
iti magnitude -4.0.
2
iti binnatog dagiti tallo--
da venus, jupiter ken bulan – ta
adda ipaspasimudaagda,
itag-ayda 'tay rima't lubongko.
laigngda't line dance a kuna daytay
ibingayda ita a rabii,
'toy gagarko anian panagdir-i:
kayatko makisalaak met 'diay,
mayat daydiay panagas-askawda
'ti likudan 'diay bulan nga addaan
nasudi a rayray mata't ragsak:
awisenda 'toy muging ken rikna.
'toy sangkabassitko innak ipan
tapno makitada met karkarmak.
3
kuaresman, 'tanud, dandani manen
daytay pannakilibut dagiti
deboto't ili a pinili, wen,
daytat' pagtangtangsit nga ilimi.
manipud 'ti domingo ramos, no
iwagwagayway ti pangen daytay
kunada a palaspas nga adu
riknat' deboto ta maitagtag-ay.
rinnabii inggana't biernes 'tay
pannagpagnat' deboto nga addaan
iggem kandela a rumayrayray
tapno adda lawag 'diay pagnaan.
tallot' simbaan a pagruaran ti
aglibut no dumteng ti rabii.
4
bassit lat' ili a pinili ngem
mamatika tallot' simbaanmi:
no 'tay semana santa 'tay puli
maymaymaysada a mararaem.
tallo a grupot' musiko daydiay
agtoktokar iti immun-una
a panawen – iti dekada da
agkakabagian a nangmurmuray.
kasla mabriat ti langit no indan
rugian panagtokarda 'ti sipnget
nga ung-ungnguen 'tay nakalawlawag
kandela a pangsilaw pagnaan.
pammatida't ama ta kumpumpet,
isu ni apo dios poon imbag.
5
adda parpardas 'diay bula, kunak,
idi 'tay partigo a luganda
immabay luganko iti dana,
daras nasigkat dagitoy matak.
panguragaan ta mapandan ngem
amak a sumakay awan iti
bula a mangiselsel 'tay kari,
makapagraong pay la 'diay tadem.
awan panangipagarupna, ay!
saannan a maipitlo 'diay napnuan
rungsotna a simmakay 'ti padana
mapanen pagpartian -- ay-ayda pay.
bula nangitarapnos pagnaan,
mapandan pakauragaanda.
