Sangapulo ket innem a sarita ti naawat ti Secretariat ti AMMA Foundation Literary Awards (AMMFLA) a para iti maika-24 nga edision ti salip iti panagsurat iti sarita a para kadagiti agdadamo a mannurat iti Ilokano.

Naggibus ti salip itay Marso 15, 2023.

Dagiti sarita:

Kinagasat ken Kinadaksanggasat; Saplit Dagiti Paltiing; Burog; Ti Panagballigi ni Magda; Bileg-nakem; Alad;

Ni Andrea ken ti Arapaapna; Kalag; Dagiti Karasaen; Panagsubli; Ti Kasimpungalan;

Ti Arado, ti Daan a Balay ken Dagiti Uleg; Ti Ayat ni Tata Andring; Diversion Road; Black Magenta; Panangatur iti Napalabas.

Nairanta ti pasalip ti AMMAFLA kadagiti agdadamo a mannurat iti sarita iti Ilokano a “kas pangaron iti reggetda a mangpatadem pay iti plumada.”

Dagiti gunggona: Umuna, PhP10,000.00; Maikadua, PhP8,500.00; ken Maikatlo, PhP7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.

Mapakaammuanto dagiti mangabak no kaano a maangay ti seremonia ti pammadayaw.

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, ken da Francisco ken Aurora Ponce (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) a nagpaayan da Cles B. Rambaud ken Juan Al. Asuncion nga editor iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014. --O