Duapulo ket maysa a sarita ti naisalip iti Salip iti Sarita ti 7th Mario Abinsay Albalos Foundation Literary Awards, kas impakaammo ti Secretariat ti Albalos Awards.
Dagiti sarita a naisalip:
Ti Tangguyob; Salve; Snowstorm; Anniniwan, Birabid;
Ti Panangaklon; Tawen ken Tiempo; Kalikagum; Tagnawa; Ti Lubong ni Angelo;
Ka Gracia; Pundasion; Ti Maudi a Daniw ni Kaka; Bannatiran, Sadino ti Papanam?; Dagiti Simutsimot iti Arubayan ni Tata Bansiong;
Ti Balasang iti Ambuklao Road; Rabbi; Anniniwan ti Daga; Ti Suno; Abaab; ken Ni Angkel Udi.
Nayawaten kadagiti kameng ti hurado dagiti naisalip a sarita.
Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnanaedanna agingga iti ipupusayna idi Marso 3, 1991 iti edadna a 40.
Isponsoran ni Jenny R. Alcausin (agnanaed iti California) ti pasalip ti foundation ken agpaay met a mangimaton iti nasao a pasalip da Jun Abinsay ken Priscilla Dela Cruz (agpada nga agnanaed iti Hawaii) iti pannakitinnulong dagiti kameng ti Bannawag.
Narugian ti salip idi Oktubre 30, 2022 (anibersario ti maika-73 a pannakayanak ni Mario A. Albalos) ken nagpatingga iti Marso 15, 2023.
Dagiti gunggona: Umuna a Gunggona, PhP15,000.00; Maikadua, PhP12,000.00; ken Maikatlo, PhP10,000.00. Maipaayan pay dagiti mangabak iti sertipiko ti pammadayaw malaksid iti medalion a maited iti mangyalat iti Umuna a Gunggona.
Naluktan ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.
Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.
Mapakaammuanto dagiti mangabak no kaano ken no sadino a maangay ti seremonia ti pammadayaw. --O
