Sangapulo ket maysa a libro nga Ilokano ti napili a finalist para iti maika-40 a National Book Awards (NBA), kas impakaammo ti National Book Development Board (NBDB).
Tinawen nga ipapaay ti NBDB ken ti Manila Critics Circle (MCC) ti NBA kadagiti kapipintasan a libro a nasurat, nadisenio, ken naipablaak iti Filipinas iti panggep a mapasantak ti panagilibro iti pagilian.
Iti daytoy a pannakaangay ti NBA, naluktan ti naisangsangayan a benneg nga Ilokano para kadagiti libro a naipablaak kadagiti tawen 2019-2021.
Lima a kategoria iti benneg ti Ilokano ti nakapilian dagiti nasao a libro.
Para iti nobela nga Ilokano, napili a finalist ti Dagiti Pundador (2020) ni Prescillano N. Bermudez ken ti Matayakon, Rosing! (2020) ni Dionisio S. Bulong.
Para iti ababa a sarita nga Ilokano, nominado ti koleksion dagiti ababa a sarita ni Efren A. Inocencio a Kulukol iti Kilikili (2021) ken ti koleksion a Villa Ken Dadduma Pay a Sarita (2019) ni Ariel Sotelo Tabag.
Nominado iti kategoria nga antolohia nga Ilokano ti Panaglantip: Antolohia Dagiti Sarita (2019). Daytoy a libro ti nakatiponan dagiti napili a sarita da Dionisio Soliven Bulong ken Eden Laguesma Cachola-Bulong. Iti isu met laeng a kategoria a nominado ti Apit: Antolohia dagiti Daniw nga Ilokano (2021) nga inedit da Oswald A. Valente ken Ariel Sotelo Tabag. Naukkon iti daytoy a libro dagiti daniw dagiti tallopulo ket dua a mannaniw manipud iti grupo nga Iti Puso ken Riknak Tagabangkagak (Bangkag Dagiti Mannalon iti Balikas itan).
Iti kategoria a daniw nga Ilokano, agbalubal dagiti agpada a premiado a mannurat a da Roy V. Aragon ken Daniel L. Nesperos. Dua a libro ti dandaniw ni Aragon ti naisalip, ti Baribari (2019) ken ti Rabii: 100 a #tweetniw (2019). Ti libro nga Anglem (2019) ti umuna a koleksion dagiti daniw ni Nesperos.
Para iti kategoria a patarus nga Ilokano, agsinnalip para iti pammadayaw ti libro ni Dr. Ronel P. Dela Cruz a napauluan iti Dagiti Sagrado a Tay-ak ti Isla Fuga (2021) ken ti libro a napauluan iti Sirib ti Puli ni Ilokano (2021) a patarus iti orihinal a sinurat iti Espaniol a linaon ti “Folk-lore Ilocano” ni Isabelo de los Reyes a naadaw iti librona nga El Folk-lore-Filipino (1890). Agpada nga impatarus dagitoy ni Ariel Sotelo Tabag.
Impablaak ti Saniata Publications amin dagitoy a libro a naisalip iti pammigbig iti nasao a pammadayaw.
Mairaman dagiti lima a kategoria iti Ilokano kadagiti siguden a kategoria iti NBA. Iti benneg ti literatura, mapagdasig dagiti libro iti Ingles ken iti Filipino: piksion (nobela ken ababa a sarita); prosa a saan a piksion; antolohia; pelikula ken drama; kritisismo iti literatura ken/wenno iti kultura; pakasaritaan ti literatura; daniw; nailadawan (graphic) a literatura agraman ti komiks; ken patarus.
Iti benneg a non-literary: arte; dagiti propesion; siensia mainaig iti kagimongan (social sciences); pakasaritaan; pagkakatawaan, isports, lifestyle, ken negosio; taraon/makmakan; siensia; espiritualidad ken teolohia; ken pilosopia. Maisina pay ti pammadayaw iti benneg ti disenio ti libro.
Maibatay iti opisial a pakaammo dagiti mangimatmaton iti NBA, adda 213 a libro a nainominar kadagiti 29 a kategoria. Maipaayan iti premio a P40,000.00 ti tunggal autor wenno para disenio iti libro a makagun-od iti kangrunaan a pammadayaw iti tunggal kategoria.
Nagdalan dagiti nainominar a libro iti pre-screening, sa naarisit dagitoy babaen ti dua a deliberasion.
Maipaayan pay iti naisangsangayan a pammadayaw kas para ipablaak iti tawen (publisher of the year) ti publisher a kaaduan iti bilang ti libro a nakagun-od kadagiti pammigbig a kas finalist ken kangrunaan a premio iti amin a kategoria ti NBA.
Maiwaragawag dagiti nakagun-od iti pammigbig dagiti kangrunaan a premio iti seremonia a maangay inton Mayo 13, 2013 iti Manila Metropolitan Theatre.
Para iti kompleto a listaan dagiti finalist bisitaen ti: https://www.cnnphilippines.com/life/culture/literature/2023/3/27/40th-national-book-awards-finalists.html wenno https://m.facebook.com/story.php?story_fbid=pfbid0J42DbdrrENjL1HHWfidZqK7ExkzULgzXDmS2BCwoGKy2wDHDD2SGktQQupNxqNxSl&id=100064281595487&mibextid=qC1gEa. (J.L. Lazaga)
