Lima a Daniw ni HONOR BLANCO CABIE
1
domingo ramosen, adu dag'tay
agkarayam, mangar-arikap 'ti
pinanid 'toy lagip naisalapay.
5 a Daniw
adut' kandela nga addaan rayray,
mayat panagaabayda iti
kalsadat' ili* nga addaan wasnay.
da apo musiko addada 'diay
paguluan libut a naurnos 'ti
kalsada abay turod ken bantay.
no agtokar bandan ti ili, ay!
gurgurong makilibut agkuti,
awan sumina, umaliwaksay.
kandela agsasaruno barteng
'diay arigda't kalsada't rabii,
adda panangkariniot' pul-oy, ay!
domingo ramosen, adu dag'tay
agkarayam, mangar-arikap 'ti
pinanid 'toy lagip naisalapay –
ni 'tanudko ikkannak murmuray.
2
nakalneken
init naalun-onen
sipnget dimtengen
musiko* nakasaganan
addadan ruangan simbaan
tambor redoblante piangpiang
bombardino trombone kornetin
trumpeta klarinete sakson addadan
ur-urayendan rebulto a mairuar simbaan
atiddog nakakandela makilibut semana santa.
~ave maria~
santa semana makilibut nakakandela atiddog
simbaan mairuar a rebulto ur-urayendan
addadan sakson klarinete trumpeta
kornetin trombone bombardino
piangpiang redoblante tambor
simbaan ruangan addadan
nakasaganan musiko
dimtengen sipnget
naalun-onen init
nakalneken.
*dati pinili troubadors band laeng. idi
nagsisinadan, timmanor ti tiger boys
band dagiti dadduma nga agkakasinsin.
3
addada nga agkunkuna matak
adu kanot' mapalpaliiwna
iti aglawlawko, dayta ket diak
patien, sabali la 'diay kitada.
kunada a maukisak kano
daydiay kadawyan a makitada,
mangtedak 'tay maibatog nga adu
kadagiti masirpat 'toy mata.
ngem no al-alubogek diak pulos
patien sao nga inda ib-ibbatan,
ay! ngem adda gagetko nga agpuros
ladawan a labsak pagpagnaan.
am-amin a mapurpurosko, ay!
idulinko ida iti burnay.
4
puyot –
naubing pay
anian kinalaing;
daytat' pagdidinnamagan
adu.
semana santa
panagasistir libut
agkakasinsin.
naiguggugor met
a nakipagtoktokar
ubing pay idi
ngem dakkel naitulongna
iti banda ti ili.
mayat ar-aribungbongda
musiko a trombonista
di bumsog pingping
'anian a laing'
daytat' italamitimda
'ti agatsusot' sang-awna.
5
iti let-ang lagip, atanudko,
manen mangngegkot' karasakasmi,
agkakasinsin bunga ti puli,
kaduami dagiti kakabsatko.
asistansia ti tawagmi no 'tay
nangina nga aldaw a ta dakam
maawis nga agtokar sakbay sardam:
addakam sungot' libut a wasnay.
daytoy daytay banda ti ilimi:
agkakasinsin ti kaaduanna,
ta uray dakami lat' agtokar
narumbot' libutmi 'ti rabii.
inton malpas ti libuten adda
pay la da musiko agtoktokar.
