Napili ni Harmony Francisca Cabie-Quinto, dati a kameng ti GUMIL Filipinas, a kas Presidente ken Chief Executive Officer ti kabbangon a Philippine-American Chamber of Commerce ti Southern Ccolorado, Inc. (PACCSoCo), maysa a non-profit a korporasion iti estado ti Colorado.
Nagturpos ni Cabie-Quinto iti University of the Philippines iti Diliman, Quezon City, agdama pay a Vice President ti Filipino-American Community ti Southern Colorado, maysa met a non-profit a gimong iti Colorado Springs a mangidurdur-as iti edukasion babaen ti Fil-Am Scholarship Fund.
Panggep ti PACCSoCo a papigsaen dagiti Fil-Am a negosiante ken itandudo dagiti propesional a Fil-Am iti abagatan ti Colorado, estado a nagpupuniponan dagiti puraw.
Mangnamnama ni Cabie-Quinto a mapakired dagiti negosiante babaen ti panagtitinnulong dagiti Fil-Am a negosiante ken propesional a Fil-Am gapu iti kinadakkel ti akemda iti komunidad.
Agakem ni Cabie-Quinto iti uppat a tawen wenno agingga iti 2026. Mangnamnama a maipatungpalna dagiti programa ken proyekto ken ti panagtitinnulong dagiti kameng; iti bukodna balikas – “equal opportunity, representation, and diversity” – kas paset ti aspekto ti lideratona.
Dati nga aktibo a lider dagiti agad-adal iti University of the Philippines ni Cabie-Quinto a nangileppasanna iti Philosophy degree ken nagpaayanna pay a Chairman ti UP Philosophical Society.
Bayat ti panagbasbasana iti abogasia iti San Beda College – unibersidad itan – iti Mendiola, napili a National President ti Association of Law Students of the Philippines.
Isu ti immuna a babai ken taga-Filipinas a napili a Presidente ti ASEAN Law Students Association nga adda ti kangrunaan nga opisina iti Jakarta, Indonesia.
Premiado a mannaniw ken sumasalaysay, iggemna ti Rufus Rodrigues Award for Excellence in International Relations. Impaayan pay ti ilina (Pinili, Ilocos Norte) iti Outstanding Piniliño Award idi 2000.
Isu ti nangibagi iti Filipinas iti Harvard University Harvard Project for Asian and International Relations.
Walo a tawen a PRO ti GUMIL Metro Manila agingga idi 1998 ken kameng ti Membership Committee ti GUMIL Filipinas idi dekada 90.
Iti edad a 14, naawat a kas kaubingan – agingga ita – a regular a kameng ti National Press Club a nakakita kadagiti sinursuratna iti Associated Editors ken DepthNews Asia.
Isu ti kasimpungalan ni Chris Quinto, Bronze Star Awardee, beterano ti Iraqi War ken retirado iti US Air Force.
Isu ti inaunaan kadagiti tallo nga annak da Honor Blanco Cabie, mannurat ti Bannawag ken agdama nga Opinion Editor ti Manila Standard, ken Maria Rosa A. Cabie, retirado a guidance counselor ken agdama a bise-presidente ti GUMIL Metro Manila. (Cles B. Rambaud/ Bannawag, Mayo 16-31, 2023 a bilang)
