Inyalat ni Jorge Richard P. Guerrero ti Siudad ti Laoag ti  Umuna a Gunggona iti Salip iti Sarita ti 7^th Mario Abinsay Albalos Foundation Literary Awards babaen ti saritana a “Ni Angkel Udi,” kas impakaammo ti Secretariat ti Albalos Awards kalpasan ti maikadua ken naudi a deliberasion ti Hunta Dagiti Hurado itoy nga Abril 15, 2023.

Ni J.R.P. Guerrero met laeng ti nangabak iti Umuna a Gunggona iti Salip iti Ababa a Sarita (Flash Fiction) iti 6^th Albalos Awards.

Nayanak ni J.R.P. Guerrero idi Abril 23, 1969 iti Siudad ti Laoag. Nagturpos iti AB Philosophy iti University of the Philippines Diliman ken Bachelor of Laws iti Northwestern University. Iti agdama, agserserbi iti Department of Agrarian Reform - Ilocos Norte a kas Agrarian Reform Program Officer II.

Dagiti kakadua ni J.R.P. Guerrero a nangabak:

Eksklusibo iti Website

TURISMO: Intayon Idiay Ayuyang Garden iti Pila, Siudad ti Laoag!

Hilario A. Espiritu Jr., Maikadua a Gunggona, babaen ti saritana a “Tawen ken Tiempo.” Agdama a Teacher I iti Luzong National High School ni Espiritu Jr. Nayanak idi Nobiembre 15, 1981 kada Hilario R. Espiritu, Sr.  ti Saguigui, Pagudpud, Ilocos Norte ken sigud a Maxima Matias Alejo ti Laoag City. Adda metten 11 a saritana a naipablaak iti Bannawag ken maysa a nobela a komiks, ti Ickaryz,  iti met laeng Bannawag; ken

Lito P. Hilidon ti Asingan, Pangasinan, Maika-3 a Gunggona, babaen ti saritana a “Ti Suno.”  Agnanaeden ken ti pamiliana iti Barangay Comon, Aritao, Nueva Vizcaya. Addan tallo a bungada ken dati a Marilyn Moran, OFW iti Hong Kong.

Nagpaay a hurado da Estela Bisquera-Guerrero, nobelista ti Bannawag, pangulo; Ariel S. Tabag, Poetry & Entertainment Editor ti Bannawag, kameng; ken Juan Al. Asuncion, Literary Editor ti Bannawag, kameng.

Narugian ti salip iti Oktubre 30, 2022 (anibersario ti maika-72 a pannakayanak ni Mario A.  Albalos) ken nagpatingga iti Marso 15, 2023.

Naluktan ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

Dagiti gunggona: Umuna a Gunggona, P15,000.00; Maikadua, P12,000.00; ken Maikatlo, P10,000.00.

Maipaayan  dagiti mangabak iti sertipiko ti pammadayaw malaksid iti medalion a maited iti nangyalat iti Umuna a Gunggona.

Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnaedanna agingga iti ipupusayna idi Marso 3, 1991 iti edadna a 40.

Ni met Jenny R. Alcausin (tubo ti Cabaroan Laud, Siudad ti Vigan ken agnaed iti California) ti sponsor ti pasalip ti foundation ken agpaay met a mangimaton ti nasao a pasalip da Jun Abinsay ken Priscilla Dela Cruz (agpada nga agnaed iti Hawaii), iti pannakitinnulong dagiti kameng ti Bannawag.

1^st Albalos Awards: 1. Ronelyn B. Ramones (“Fina”); 2. Rhea Berroy (“Ti Aktibista”); 3. Arnold P. Jose (“Hawaii Ditoyen, Mikiong!”);

2^nd: 1. Remedios S. Tabelisma-Aguillon (“No Nairanta nga Agpaay Kaniak”); 2. Roselyn C. Campano (“Sanguek Manen ti Sumaruno a Pannakidangadang”); 3. Florencio B. Bayuga (“Uray Nababa ti Adalmo, Fren”);

3^rd:  1. Isaac R. Pedrera (“Ti Naembargo a Daga iti Cagat”); 2. Arnold P. Jose (“Ni Lakay Gapit a Bayog”); 3. Virgilio S. Naungayan (“The Walking Dead”);

4^th: 1. Remedios S. Tabelisma-Aguillon (“Naim-imbag Laengen Ngem ‘Diay Awan”); 2. Manuel D. Benosa, Sr. (“Ti Naikamang”); 3. Quezon E. Javier (“Paniang”);

5^th: 1. Rodolfo D. Agatep, Jr. (“Marunggay”); 2. Remedios S. Tabelisma-Aguillon (“Agsupadi a Lubong”); ken 3. Arnold P. Jose (“Mister Bin”).

6^th: 1. Jorge Richard P. Guerrero (“Ti Balay ti Padi”), 2. Prodie Gar. Padios (“Lalat”), 3. Lito P. Hilidon (“Ti Balud”), 4. Ryan A. Dulig (“Running Lights”), ken 5. Jobert M. Pacnis (“Idiay Plasa”).

7^th: 1. Jorge Richard P. Guerrero (“Ni Angkel Udi”); 2. Hilario A. Espiritu Jr. (“Tawen ken Tiempo”); 3. Lito P. Hilidon (“Ti Suno”). (CLES B. RAMBAUD)