Inyalat ni Sonny A. Vila ti Brgy. 13, Naglicuan, Pasuquin, Ilocos Norte, ti Umuna a Gunggona iti Salip iti Sarita ti 24^th AMMA Foundation Literary Awards, babaen ti saritana a “Ni Andrea ken ti Arapaapna,” kas impakaammo ti Secretariat ti AMMA Foundation Literary Awards.

Kadua ni Vila a nangabak da:

Marcelino Francisco D. Santos ti Calangcuasan, Salcedo, Ilocos Sur, Maikadua a Gunggona, babaen ti saritana a “Black Magenta,” ken

Rey Joel B. Guerrero ti Purok Beleng, Tuding, Itogon, Benguet, Maikatlo a Gunggona, babaen ti saritana a “Panangatur iti Napalabas.”

Dagiti kameng ti hunta ti hurado: Linda T. Lingbaoan-Bulong, pangulo; Juan Al. Asuncion, Literary Editor ti Bannawag; ken Ariel S. Tabag, Poetry & Entertainment Editor ti Bannawag

Dagiti kangrunaan nga isponsor ti salip: Amado I. Yoro ken Francisco T. Ponce, agpada nga agindeg iti Hawaii.

Nagpaay met a Chairman ti Secretariat ni Cles B. Rambaud ti Bannawag.

Naggibus ti salip idi Marso 15, 2023, nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a nangabak iti daytoy nga edision ti AMMAFLA.

Malaksid iti premio a kuarta, maipaayan pay dagiti nangabak iti sertipiko ti pammadayaw. Para iti Umuna a Gunggona, PhP10,000.00; Maikadua, PhP8,500.00; ken Maikatlo, PhP7,000.00.  

Maikatlo iti lima nga agkakabsat ni Sonny A. Vila. Agnaeden ken ti pamiliana iti Brgy. 171 Bagumbong, North Caloocan City. Dua ti annakda iti kaingungotna, da Kennard ken Katryn, agpadan nga adda iti kolehio. Nagturpos iti Bacheloŕ of Science in Marine Transportation iti P.M.I. Colleges iti Sta. Cruz Manila. Nagpaay a marino; iti agdama, maysa a marine offshore crew iti Damman, K.S.A..

Naipasngay ni Marcelino Francisco D. Santos iti Siudad ti Malabon ngem dimmakkel iti Salcedo, Ilocos Sur. Nagturpos iti kinainheniero, nagtrabaho iti Maldives ken iti U.S. Naval Base, Guantanamo Bay, Cuba a kas surveyor. Nagserbi pay a kas Dining Supervisor iti dua a nalatak a restauran iti Metro Manila ken nagtrabaho met a Team Leader iti maysa a Call Center iti Eastwood iti nabayag a tawen. Iti agdama, kunana nga, “Agindegakon iti bassit a talon ken kalapawko ditoy San Miguel, Bulacan.”

Adda metten naipablaak ni Rey Joel B. Guerrero a salaysay iti Bannawag. Idolona da “mamak nga Estela A. Bisquera-Guerrero, mannurat ti Bannawag; ken lolok nga Ernesto L. Bisquera Sr., agpada a mangipatpateg iti Literatura Ilokana." (Cles B. Rambaud)