Lima a Daniw ni HONOR BLANCO CABIE
gregorio, exsurge et respice in protectores tuos
1
o apo padi goyo* ti batac
tumakderka, sapulem man ida
nangsaluad a kaduam ngem naitublak.
5 a Daniw
da sandataan** a nangmatmatmat
kadagidi soldado 'ti dana
nakasaganada nakigubat.
dumteng petsa ti pannakayanak
ti ili a naglemmengam a ta
isagsagananat' panagrambak.
ni apo padi goyo kunkunak
nagasat ta malaglagip latta
ngem sandataan a naisagsagmak.
da sandataan, ay! maasiak,
ni maysa a bato awan man la
'tay makapuling kas batonrimat.
o apo padi goyo ti batac
tumakderka, sapulem man ida
nangsaluad a kaduam ngem naitublak.
nagbuis 'ti biag ken dara't tamtambak.
*gregorio labayan aglipay (may 5, 1840, batac-
sept 1, 1960, manila). agtawen iti 163 intono maika-5
ti mayo, 2023. inkasarna ni pilar jamias, taga-sarrat.
idi maika-12 ti marso 1939, 18 a bulan sakbay a pimmusay.
**dagiti gerilia a taga-pinili a nangsalaknib ken
ni aglipay idi sapsapulen dagiti soldado-amerikano
idi kattapog ti maika-20 a siglo iti karissikan ti
philippine-american war (para iti dadduma a
detalye, basaen ti PINILI metamorphoses into
motion, pp. 37-48 (cabie, armiandy publishers,
cainta, rizal, 2012)
2
kuna ni ama ikiong nga adu
kanot' kadena de amor sadiay
inna nalabsan 'diay labes bantay
sabsabong ta nagdungdung-aw kano.
sidiran dagiti panteon inna
nangngeg inda panagdung-aw, kas man
daytay agsapa ta napukawdan,
saebbekda kano mangraprapa.
kadena de amor addan laylay,
pati kolor sabsabongda a ta
agkupasen, anian kinarungsot
a gasat, nairidisdan 'ti liday.
derosas a kolor 'diay sabongda
nagpuslit, ay! isudan nagbugsot.
3
addada nga agkunkuna no 'tay
sikat' mabati ta maigalutka
'ti pangta a mangted liday rikna,
rikna a pagbitinan 'tay liday.
ta no nakadkadua idi kalman
awandan aminen awan metten
kaginnarakgakmo iti pangen --
dayta ngatan riknat' nayaw-awan.
depende met ketdi no aniat' pangta
iti panirigan panunotmo,
no 'tay pangta mangted garumiad, ay!
ditan a marapa dayta rikna.
ngem no bendision awat mugingmo
pangta a kunkunada murmuray.
4
nadumaduma a panirigan:
addada, 'tanud, nga agkunkuna
tugot 'diay kadaratan maipapan
ken ni jesus nangsalbar ti daga.
napintas a pagsaritaan 'diay
panangukarkardan sadino ti
pagturongan tugot sadiay baybay:
saanda nga ammot' puon pati.*
'diay daniw ta adda mensahena,
ay! ngem ni agbasbasa, kunkunak,
ammona met ngatat' gapuananna?
ay! 'tanud naruayda nga agkutkutak.
awan pay ti pangretretrado 'di
magmagna ni jesus – adda kadi?
*aduda a mangibagbaga – nakaigapuan ti
dinnarum – nga isuda ti nangisurat
iti daytoy a daniw: burrell webb; mary
stevenson (1936); margaret fishback
powers (1964); carolyn joyce carty (1963).
idi simrek iti kultura popular iti amerika daytoy
paulo a “footprints” inturong dagiti obra maestra
iti panagbiag dagiti misionario, kas iti biograpia
ni frances ridley havergal (1883) ken iti “psalm of
life” ni henry wadsworth longfellow (1839).
5
saanmon nga itingtingig dayta
lapayag no adda 'tay mangngegan,
bay-am lattan ida, bibibiangda
no maymaysa inka tugtugawan?
ta no taliawem amin dagitay
agtataul iti pagpagnaam
ket didaka met nga'd nga itag-ay
ta amangan maladawka't sardam.
nalabit nga ang-angawendaka
ngem no mangngeg adu a tao 'diay
taulda a gumarugad adda
'ti mugingda innak isalapay.
ituloymo lattat' as-askawmo,
langto 'ta mugingmo iburaymo.
(Ladawan: Pammadayaw ti wikipedia)
