Innem a mannurat a nangabak kadagiti salip iti panagsurat iti sarita ti mapadayawan bayat ti “Rabii ti Pammadayaw” ti Dap-ayan 2023 ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-taaw) a maangay iti Bangui National High School, Bangui, Ilocos Norte, inton Mayo 5, 2023.

Nangabak dagiti mannurat iti Salip iti Sarita ti 7^th Mario Abinsay Albalos Foundation Literary Awards (Albalos Awards), ken iti Salip iti Sarita ti 24^th AMMA Foundation Literary Awards (AMMAFLA).

Dagiti mapadayawan a mannurat iti Albalos Awards:

Umuna a Gunggona, Jorge Richard P. Guerrero ti Siudad ti Laoag (“Ni Angkel Udi”),

Maikadua a Gunggona, Hilario A. Espiritu Jr. ti Pagudpud, Ilocos Norte (“Tawen ken Tiempo”), ken

Maikatlo a Gunggona, Lito P. Hilidon ti Asingan, Pangasinan ngem agnaeden iti Aritao, Nueva Vizcaya (“Ti Suno).

Dagiti mapadayawan iti 24^th AMMAFLA:

Umuna a Gunggona, Sonny A. Vila ti Pasuquin, Ilocos Norte (“Ni Andrea ken ti Arapaapna”),

Maikadua a Gunggona, Marcelino Francisco D. Santos ti Salcedo, Ilocos Sur (“Black Magenta”), ken

Maikatlo a Gunggona, Rey Joel B. Guerrero ti Itogon, Benguet (“Panangatur iti Napalabas”).

Agpaut ti Dap-ayan 2023 (Kombension Nasional ken Literary Seminar ti GUMIL Filipinas) iti tallo nga aldaw (Mayo 5-7) nga addaan iti tema a “Lagip ken Sirmata: Ni Mannurat nga Ilokano ken Dagiti Karit ti Panawen.”

Maluktan ti Dap-ayan iti Mayo 5 manipud iti alas 7:30 iti bigat agingga iti tengnga ti aldaw a panagpalista dagiti delegado.

Maangay ti panglukat a programa iti malem a pakayalnagan dagiti libro dagiti mannurat nga Ilokano a nabiit pay a naipablaak ken pakairugian ti “tungtongan” iti literatura malaksid pay kadagiti dadduma nga aktibidad.

Iti karabiyanna, maangay ti “Rabii ti Pammadayaw” a pakapadayawan dagiti nangabak iti Albalos Awards ken AMMAFLA, ken dagiti Bucaneg awardees.

Iti Mayo 6, Sabado, maituloy ti tungtongan iti literatura. Iti karabiyanna, maangay ti “Rabii ti Kultura” a pakapilian ti Mrs. GUMIL Filipinas 2023.

Iti maudi nga aldaw, Mayo 7, Domingo, maituloy ti tungtongan iti literatura. Kalpasan daytoy, maangay ti eleksion a pakapilian dagiti baro nga opisial ti GUMIL Filipinas.

Agbayad ti tunggal delegado iti PhP1,500.00 para iti tallo nga adaw ken dua a rabii a taripnong. Maaramat ti kuarta a para iti kanen, pagturogan, ken dadduma pay a kasapulan iti nasao a Dap-ayan.

Para iti nayon nga impormasion, makiuman iti Sekretario Heneral ti GF, ni Apo Neyo Escobar Valdez. (Cles B. Rambaud)