Pimmusay ni Sinamar R. Tabin, mannurat ti Bannawag, iti edadna a 78 itoy nga alas-6:15 iti bigat itoy nga aldaw (Abril 24 iti Utah, U.S.A; Abril 25 iti Filipinas).

Naipasngay iti Pagudpud, Ilocos Norte idi Abril 20, 1945, agnaed ni Samar (birngasna kadagiti kamannuratanna) iti West Valley City, Utah, U.S.A., kaduana ti pamiliana, agingga iti ipupusayna.

Maysa a mannursuro, nagpaay iti Quirino Elementary School, Project 2, Quezon City, ken kameng ti Curriculum Writers ti Division of Quezon City. Nagsursurat iti sarita iti Bannawag, maibilang ti “Anangka” a maysa kadagiti kapipintasan a saritana. Naipablaak ti nasao a sarita iti Mayo 4, 1970 a bilang ti Bannawag ken naulit a naipablaak daytoy iti Enero 18, 2016 a bilang ti magasin.

Kaingungot ni Samar ni Lorenzo G. Tabin, mannurat met laeng ti Bannawag. (Cles B. Rambaud)