Impaayan ti Philippine National Police iti 21-gun salute ni Napolcom Commissioner Celia Sanidad-Leones iti pannakaipumponna iti Narvacan Catholic Church Memorial Park itay Mayo 17, 2023, a masarakan iti mismo nga abay ti Simbaan Katoliko. Kas bilin ti Commissioner, naitabon iti mismo a tanem daydi amana, ni Dios-ti-aluadna a Congressman Pablo Sanidad.

Nabigbig ni Commissioner Leones iti naunday a serbisiona iti Napolcom. Imbukbokna ti panawenna iti nasao nga ahensia a nangrugianna a nagtrabaho manipud iti baba agingga a maragpatna ti takem a kas Commissioner agingga iti panagretirona.

"Tinurposna ti Foreign Service iti University of the Philippines. Ngem idi agtrabahon iti National Police Commission, inggubetnan ti bagina a nagserbi iti ahensia tapno maital-o ti kasasaad dagiti polis ken dagiti umili," panangilawlawag ni Mayor Pablito V. Sanidad, Sr.

Adingen ni Mayor Sanidad ni Commissioner Celia. Buridekda ni Atty. Arno Sanidad.

Nadumaduma a nangangato nga opisial iti pagilian, dagiti gagayyem, nakatrabahuan, ken dagiti natulonganna ti immay nangipeksa iti panagyamanda iti pimmusay a Commissioner.

Malaksid kadagiti opisial ti turay, inatendaran pay daytoy dagiti turayen ti Napolcom, ken ti PNP Ilocos Sur iti panangidaulo da Provincial Director Marlo Aquino, Lt. Col. Louise Benjie Tremor, Lt. Col. Simon Damolkis, ken dadduma pay nga opisial ti ISUPPO.

Indauluan met ni Major Alexander John Dangli, COP ti Narvacan, ti pannakaipaay ti military honors iti Commissioner a kas pangbigbig iti serbisiona iti pagilian.

Mabigbig ni Commisioner Celia Sanidad-Leones a maysa kadagiti pioneer a Narvacanean a nangitandudo iti women empowerment. (Eliseo B. Contillo)