IGOROT STONE KINGDOM. Kalpasan ti pannakalukat manen ti Igorot Stone Kingdom idi Abril 3, 2023 (temporario nga impaiserra ti LGU ti Baguio itay napan a tawen), agdudupudop manen dagiti lokal ken ganggannaet a turista iti Igorot Stone Kingdom, maysa kadagiti pagpasiaran iti Siudad ti Baguio, tapno makita ken maalaanda iti ladawan dagiti napagtutuon a bato nga agpangato iti bakras ti bantay. Masapul laeng ti napigsa a tumeng ken bara tapno makalay-at ti kangatuan a pasetna. Iti tengnga ti Igorot Stone Kingdom, adda marker nga agkunkuna nga idi Marso 1, 2020 (sakbay ti pandemia), nagparang ti maysa a puraw a nuang ken ni Pio G. Velasco wenno ad-adda nga am-ammo a kas Ama Bagow-an iti daytoy a disso ket nagbalin daytoy a senial kenkuana tapno bangonenna ti inawaganna iti Igorot Stone Kingdom a parparmataenna sipud pay idi ubing idiay Sabangan, Mt. Province. Adda masingir a sangagasut a pisos nga entrance fee kadagiti agpasiar iti Igorot Stone Kingdom. (Mancielito S. Tacadena)
