Lima a Daniw ni HONOR BLANCO CABIE
Ni Maria Rosa A. Cabie, kameng ti Handmaids of the Lord, Legion of Mary, ken Elderly Ministry iti Sacred Heart of Jesus Parish, Cainta, Rizal; kaduana dagiti tallo nga appokona a bayabayna (Mikhail Bernard VIII, Mirko Sean Alexander, ken Milek Andrey) iti naangay a Santacruzan ti parokia iti panagleppas ti Mayo 2023.
búsqueda por la reina helena
de la santa cruz recreada
1
anian karuayda nga addaan lapsat,
5 a Daniw
isuda nga adda 'ti libut 'ta
a rabii – anian panagrimat
malabsanda a parte ti daga.
addan helena* nga agig-iggem
'ti krus patien mammati a pudpudno
nakailansaan ni jesus malem
idi nanubbot nagsatan, nasdo.
mano a siglo ti naglabasen
addan maaw-awagan 'ti tibag,**
adda payen 'tay libut ti pangen,
'tay santacruzan a paseten biag.
ngem masmasdaawak, atanudko,
adda payen kunada nga ina
ni reyna a helena, ay! diosko,
addan ni reyna emperatris dita.
ni kan helena ken emperatris
maymaysa ti iladladawanda,
ay! ngem 'ti agdama, iti pispis
da makilibut ta awan latta.
ta sapay met ngamin napnuan ayat
ni filipino a mangbuya 'tay
naka'd-adu nga addaan rimat,
appo ni eva a mangmurmuray?
aduda nga awagan reina ngem
awan 'ti likudan ti mugingda
no sapay met a reinada – essem
rikna ken karkarma dayta ngata.
ni reyna emperatris*** agig-iggem
ti bola**** a pagtakderan ti krus:
senial adda kenkuana 'tay raem
nga impaima met lan apo dios.
adda met musiko nga agtoktokar
iti wasnay ti paglibutanda,
adut' agbuya, ay! awan pambar,
anian pananglidlidlidda't mata.
umanges libut no malpasen 'tay
panangrambak ni apo padi 'ti
liturhia 'ti uneg daydiay balay
ti dios ama nga ari ti puli.
*joy cruz ti mother butler guild ti
sacred heart of jesus parish, cainta,
rizal.
**pannakaidrama iti napasnek
a panangbirbirok ni helena, ina ni
constantino, iti nasantuan a krus
a nakailansaan ni jesus 'diay bantay
kalbario.
adda dagiti agkuna a dakkel ti
impluensia ni helena iti anakna
kas maysa a naindaklan a lider
dagiti kristiano agpapan iti agdama,.
***maria rosa cabie ti legion of mary,
handmaids of the lord ken elderly ministry.
****daytoy 'tay globus cruciger, wenno "the orb
and cross" iti ingles, simbolo ti autoridad kadagiti
kristiano manipud pay idi 'middle ages' –
iti nagbaetan ti pannakarugpo ti roma idi 476 CE ken ti
pannakairugi ti renaissance idi 14th century.
2
anian a kinaraniag dalanda
adu a reyna napnapnuan rimat,
anian a panaganges labsanda,
adu nga isem ken 'tay sipsipat.
no ar-arigen 'diay mabaddekan
no ruotna adda lumangto, ay!
no 'tay sipnget adda malawagan
ta dagidiay pingping rumayrayray.
ay! ngem masair 'toy panunotko:
ammodat' kaibtogan met ngata
'diay libut santacruzan, 'tanudko,
isuda nga adda koronana?
iti panagaskawda't pagnaan
'tay bugas krus a ta naregregdan.
3
bagin helena nagkorona 'ti
adda atiddogna a libut ta
nakaaritos 'diay pammatida
a ni helena maymaysa't puli.
isu ti reyna kan a pudpudno
adda man dagitay dadduma, ay!
maikadua, maikatlo – ay-ayda pay,
anian a nginnginnato 'tanudko.
ay! ngem ania kadi adda pay 'tay
helena a sabali – emperatris
kano ti awagna, isut' inan
helena* – ay! manen, ay-ayda pay.
ti la adda nga iselselsel pispis:
bukel ti mayo ta napukawdan.
*kadagiti amin a panid ti pakasaritaan
ni helena, naam-ammo kalpasanna a kas
flavia julia helena agusta, nga ina ni
constantino 1 awan ti naibaga nga inana.
4
no dandanin dumteng ti tudona
iti nakaidulinan kadkaduak
mapankami agala't tabtaba
iti bangkag 'diay abay tamtambak.
'ti sirok nakuyem a langit ta
kas man uong agriritunokam,
bigao mapmapno kadagita
pilianminto sakbay dumteng sardam.
anian ti imasnan maperresan
adu a tabtaba nga inyawidmi,
pigsa't panagtapog kakellengan,
'tay pagdidinnamagan ti puli.
ay! tabtabaka a mangpataba
‘ti daytoy mugingko ken 'toy rikna.
5
wenno koma daytay intakdangda
a pukpuklo, ur-urmot 'diay taaw,
karabukob mangngegmi nga iriaw
daydiay panag-dios ti agnginana.
adda lusiawna a kamatis 'diay
nagalip naiwarwarakiwak 'ti
sida a naidasar pangrabii –
alla agkakamakamen kidday.
bussog lakay a nuang, dayta daytay
yaw-awagmi nga ipinili no
panagal-alusiis 'tay addan
rigrigat dikan a makataray.
idi ubingak pay, atanudko,
daytoy ti lubong a dinakkelan.
