Maitabon itoy a Hunio 7, 2023, Mierkoles, ni mannurat ti Bannawag Virgilio D. Domaloy, tubo ti Agat, Sison, Pangasinan. Maidagas nga umuna iti UCCP Church iti alas otso iti bigat sa kalpasanna, maitulod iti Agat Cemetery.

Sakbayna, itoy a Hunio 6, 2023, Martes, iti alas-10:30 iti bigat, angayen ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, ti necrological service para itoy simmina a kameng ti gunglo babaen ti pannakikoordinar ni GF-DepEd Urdaneta City Chapter President Dr. Edmundo Bisquera, agpapaay pay a direktor ti GF, kas impakaammo ni GF President Remy Albano.

Pimmusay ni Boying, awagna kadagiti kasingedna, idi Hunio 1 iti edadna a 71. Inulilana dagiti annakna a da Vanessa Gilmar ken Mark Russel; dagiti appokona a da Joshua Victor Ivan Miguel ken Miel Andrei; ken dagiti kakabsatna a da Cornelio ken Grace.

Premiado a mannurat, kaudian a nangabakanna ti Salip iti Sarita ti Apolonio & Iloreta Awards for Ilokano Literature 2023 babaen ti saritana a “Ni Andiong a Para Tangep iti Tanem” a nangyalat iti Maika-3 a Gunggona. Nangab-abak met iti salip iti sarita ti dati a Gov. Roque Ablan Awards for Iloco Literature.  Kas propesional a photographer, adu pay dagiti nangab-abakanna a salip iti potograpia.

Nagpapaay pay a kameng ti hunta direktiba ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw.

Kameng ti Sheriffs’ Confederation of the Philippines (SCOPHIL), nagretiro a kas Sheriff iti Regional Trial Court - Office of the Clerk of Court, Siudad ti Urdaneta.