Al-alamanuen ni Presidente Chun Doo-Hwan ni HBC, maysa kadagiti delegado manipud iti Organization of Asia and Pacific News Agencies iti Cheong Wa Dae a palasio, opisial a pagnaedan ti presidente.
5 a Daniw ni HONOR BLANCO CABIE
Los periodistas son inteligentes
y tienen buen sentido del humor
1
iti naangay a dap-ayanda
5 a Daniw
'diay seoul, naikkanda't gundaway: 'tay
gundaway makaalamanoda
'diay lider* ti koreano a puli.
panagsisinnukat 'ti isem 'tay
di nakaruk-at 'ti pananggammat
ti korean television, ay! naruay
minuto a napumpunno't rimat.
idi ni ilokanon** 'tay naikkan
batang lagip 'tay imbuksilanna,
impan ni presidenten 'tay riknan
a panagyaman kakailianna.
daydiay irut arakup liderda
ni ilokano naitag-ay rikna.
*chun doo-hwan (jan 18, 1931-nov
23, 2021; presidente idi 1980-1988)
*hbc: (kameng ti organization of asia
pacific news agencies manipud
iti filipinas a nakaiskediul nga agmiting
'diay seoul kadayta nga agosto) 'mr
president, many of my relatives and
countrymen fought alongside your
countrymen during the korean war to
preserve freedom and democracy.'
(daras nga inarakup ni presidente
chun ni hbc iti dayta nga inibbatan
a balikas ti maikadua).
2
ahmad mh (general manager ti bernama news
agency ti malaysia ken presidente ti oana, idi
sangsangpet ni hbc manipud iti filipinas bayat
ti panagur-urayna iti kimpo airport kadagiti
delegado manipud iti sabali a nasion) honor,
before you arrived, i was reading this magazine
where an article said 'filipinos are the best
english speakers in asia,' do you believe that?
hbc: perhaps that was written by a malaysian.
Ni Ahmad Mustapha Hassan, General Manager ti Bernama News Agency ken Presidente ti Organization of Asia and Pacific News Agencies (maikatlo manipud iti katigid); ken ni HBC (maikadua manipud iti kanawan), nangibagi iti Filipinas.
kasla dulluog ti kapartak 'diay
adda simbeng a gargarakgakda
iti napardas a disnog inna
imbuelta a nangted iti keltay.
adda idi tungtongan dagiti
ehekutibo't damag 'ti rehion
ti asia ken pasipiko, bubon
pagkarkarsan nabaknang a puli.
nakita ken nadlawda uray pay
nga amang ni pinoy 'tay ub-ubing
ammonat' umallawat 'tay sao,
awan kenkuana 'tay panagtaray.
kapardasna nasirpat 'tay sarming
'diay dilana pudnbo a di bullo.
3
anian a pannakaiwalawal 'diay
landok uneg danum 'ti pantalan
'diay busan 'ti maysa nga ipapan
baniaga a bapor namagtignay.
masapul nauneg tapno pulos
awan 'tay pannakaan-anudna
no bagyo a narungrungsot adda --
ammom manangngaasin apo dios.
agsagawisiw pay ti angin 'di
simmanglad ti bagyo narungrungsot
nangrunan 'di ibayakabakna
ti tudona kadayta a rabii.
adda lailona ti kudkuddot
ti oras nangitag-ay karkarma.
4
Ni HBC, bayat ti panangilawlawagna iti posision ti Filipinas iti makunkuna nga "Imbalance in the Flow of World News" iti miting ti Organization of Asia and Pacific News Agencies 'diay Seoul.
iti purok nga asideg iti
kuna a DMZ* iti baet
korea a dua, maymaysa a puli,
nasurbot 'toy dapan a kimmapet.
sadiay simmurongkam idi – anian
panagkibbayok 'di naamuanmi
iti labes aangsanmi daytan
ti ilin kim il sung** mangipakni.
sinaggaysadakam inikkan 'tay
kuna a seladon** inyawidmi,
tunggal mata nagbitin 'tay rayray,
inig-igpilanmi daytay kari.
ammok a diak mauliten mapan
sadiay – ap-apirasek 'toy dapan.
*daeseong-dong (wenno tae sung dong,
jayu-ui maeul ken daeseongdong-gil),
away iti asideg ti DMZ, kas bamban
iti abay ti 38th parallel, agatiddog iti 250 a
kilometro ken agakaba iti 4 a kilometro
a manggudua iti south ken north korea.
**kim il sung (lider manipud idi 1948 inggana't
natay idi 1994).
5
impaspasiardakam pay 'diay adut'
bumisbisita a turista't ruar
ti seoul* – sadiay awan agpampambar:
'tay sariugma ta kumunkunnot.
sadiay a mailadawan dagiti
ugali dagiti immun-una
nagili kimmaramot 'ti daga:
isarmingdat' ugali ti puli.
mano a ribon a tawen, ay! ngem
saanmon lukiben daytay libro,
masirpatmo ida a kas met la
'ti un-una – bimmangon 'toy raem.
kunak kastoy koma ti lubongko --
ngem ni maysa a bato awan latta.
*korean folk village, 99 nga ektaria 'diay
minsokchon-ro, nasurok a 34 a kilometro
manipud iti seoul.
