Pimmusay ni Pablito Trinidad, mannurat ti Bannawag, iti edadna a 76, itay Hunio 18, 2023.

Tubo ti Barangay Lungog, Narvacan, Ilocos Sur, nangrugi a nagsurat iti Bannawag idi dekada 60s. Ad-adda a sarita ti sinursuratna ken adda dagiti saritana a nairaman iti antolohia  nga impablaak ti GUMIL Filipinas.

Impamaysana ti nagsurat iti crossword puzzle wenno Sinniriban para iti Bannawag agingga iti ipupusayna.

Mabigbig ni Trinidad gapu iti pingetna a nangsuba iti dawel ti biag. Kas kinuna ni Francisco Casil, mannurat met laeng ti Bannawag a kinaadalanna iti hayskul iti Pacita Educational Institute (PEI), maysa idin a paraplegic wenno saanen a makapagna ni Pabling (nalatak a birngasna kadagiti gagayyem ken kakabagianna) gapu iti sakit. Iti laksid dayta a kasasaadna, saan a naupay; intuloyna ti nagbasa  iti Far Eastern University (FEU) a nagileppasanna iti kolehio.

Nabayag a nagpaay a tesorero ti Barangay Lungog ken nagtrabaho pay iti Metro Lungog Muti-Purpose Cooperative agingga iti panagretirona.

Inulila ni Trinidad ti kaingungotna a ni Juliet ken ti bugbugtong nga anakda a ni Arvin. (Eliseo B. Contillo)