Salaysay da ARCHIE ANIPOT ken GARWOOD ANIPOT
KADAWYAN a makakitatayo iti wall painting kadagiti simbaan, kapilia, museo, pagadalan ken dadduma pay a pasdek. Ngem no naipinta daytoy iti bukod a pagtaengan, naisangsangayan daytoy.
Iti barangaymi a Capangpangan iti Siudad ti Vigan, adda balay a kastoy.
Impinta ni Isidro Fontejon Amano (Angkel Sidro ti awagmi kenkuna, kas panagdayaw, uray no saanmi a kabagian) ti ladawan ni Apo Hesus iti diding ti family house-da a naaramid ti ladrilio ken apog. No lumaemka iti balay, maipasabat kenka ti 170 x 120 sentimetro a painting a naipinta iti acrylic.
Kinuna ni Angkel Sidro nga inrugina nga impinta daytoy idi 1952, idi agtawen iti 21. Dina ketdi malagip no ania a tawen a napalpasna ti painting. 92-na itan ni Angkel Sidro.
Manipud Kadagiti Agdama a Kameng ti Bannawag: Dios ti Agngina!
Nupay adapted wenno adda nangibasaranna nga orihinal nga imahen, makita ti kinasiglat ni Angkel Sidro uray no awan ti makuna a pormal a panagadalna iti panagpinta wenno panagdrowing. Ti laeng tarigagay a mangpasantak iti nakayanakanna a talento ti nangparegget kenkuana nga agsursuro a bukbukodna.
Nagadal iti building construction idi hayskul iti Ilocos Sur Trade School iti Vigan. Ngem saan a nakaturpos ta karigat idi ti biag iti dayta a panawen.
Naipasngay ni Angkel Sidro idi Mayo 15, 1931. Maikatlo iti uppat nga annak da Sesinando Amano ken Maria Fontejon, agpada a taga-Capangpangan. Duduada laengen ken ni manangna a Segundina, retirado a maestra a naikamang iti Santa, Ilocos Sur. Nabayagen a pimmusay da manangna Juanita ken adingna Valeriano, nga agpada a di nagasawa.
Iti pannakiumanmi kenkuana ken iti pamiliana, kinuna ni Angkel Sidro nga adda iti elementaria idi agessem nga agdrowing. Iti naminsan a pannakaimatangna iti amana a nakaiggem iti singkol a kawitan, indrowingna daytoy iti papel. Sangapulo ti edadna idi. Lapis ti inusarna. Pagliwliwaan ti amada ti agtaraken iti manok a para pallot ken makipolpolis.
Intultultuloyna ti nagsursuro ken nagtakuat iti nadumaduma nga estilo ti panagdrowing iti bukodna a wagas. Sinarakuyanna ti masapulanna iti panagpinta babaen ti panagekstrana iti nadumaduma a trabaho.
Idi Marso 8, 1980, inkallaysa ni Angkel Sidro ni Anti Constancia Rimalos ti Lubong, San Vicente, Ilocos Sur. 23-na idi ti nobiana, 49 met ni Angkel Sidro, isu a makuna a nalakayan idin a baro.
Nagtrabaho ni Angkel Sidro a para lettering iti Northern Tobacco Redrying Corporation Inc. iti Paoa, Vigan, Ilocos Sur manipud 1975 agingga iti1990. Iti baet ti trabahona, inragpinna latta ti agpintapinta. Kaaduan kadagiti obrana ti nairaman kadagiti exhibit.
Idi Abril 1, 2018, iti edadna nga 87, sinublianna ti nagkupasen a wall painting. Pinabarona. Nalpasna daytoy iti Abril 20, ket insuratna iti baba ti painting:
“Resurrecion”
GLORY BE TO GOD IN JESUS’ NAME
UNCLE SID: 4-1-20-18
Iti agdama, nupay napigsa pay laeng ti bagina no maidilig kadagiti kaedadanna, saanen nga agpimpinta ni Angkel Sidro. Kumapuy ngaminen ti panagkitana.
Pagsayaatanna, natawid ni Crisostomo, ti maikadua kadagiti tallo a putotna, ti laingna nga agpinta.
Kas ken ni tatangna, adda iti elementaria ni Crisostomo idi agessem iti panagdrowing. Impapatina ti nangasa iti talentona ket nangala iti Bachelor of Fine Arts iti University of Northern Philippines iti Vigan. Nagturpos idi 2009. Idi 2019, nag-semi-finalist iti Metrobank Arts and Design Excellence (MADE) ti acrylic painting ni Crisostomo a napauluan iti “Poot ng Kahapon.” Naaramidna kano daytoy nga obra idi naalisan ti asawana iti damoda koma nga anak. —O
Mabalin pay a magatang ti Bannawag iti
Shopee: http://bit.ly/3JsH4Ws
Lazada: http://bit.ly/3TGYELa
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti dadduma pay a detalye, kontaken ti circulation department iti 8527-8121 Loc. 369, 09171360110 wenno ag-email iti [email protected].
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/bannawag.magazine
Facebook Public Group: https://www.facebook.com/groups/1668855693563462.
Dios ti agngina. Isip pabaknangen, Bannawag ti basaen!
