Ilokana-Amerikana, kampeon iti golf iti maika-78 a US Women’s Open
Pinadayawan ni Allisen Corpuz ti Filipino nga amana iti pannakagun-odna ti kampeonato iti maika-78 US Women's Open idiay Pebble Beach, California, USA idi Hulio 9, 2023. Inyalatna ti $2-milion (agarup PhP111.2 milion) a gunggona.
Inatiw ni Corpuz dagiti kabalubalna a da Charley Hull (Inglatera) ken Shin Ji-yai (South Korea) kalpasan a maka-72 holes iti 9-under 279, tapno masipdutna ti umuna a kampeonatona iti Ladies Professional Golf Association (LPGA), ken umuna nga Amerikana a nakaala iti titulo kalpasan ti 20 a tawen.
Nayanak ken dimmakkel iti Hawaii ni Allisen, ngem tubo ti Ilocos Norte ti amana a ni Marcos Corpuz; idinto a naggapu iti Korea ti inana a ni May. Segun ken ni Allisen, uppat ti tawenna idi nangrugi nga agay-ayam iti golf. (Kristel Satumbaga-Villar ken Agence France-Presse)
