Nangaramid ti Department of Foreign Affairs (DFA) iti microsite (bassit a website) a nakailanadan dagiti impormasion maipanggep iti 2016 Arbitral Award a naited iti Filipinas iti isyu mainaig iti West Philippine Sea. Ti nasao nga arbitral award ti nangikeddeng iti kaadda ti karbengan ti Filipinas kadagiti ilablabanna a teritorio iti West Philippine Sea. Naaramid ti microsite kas pananglagip iti maika-7 nga anibersario ti pannakaited ti award.
Kinuna ni DFA Secretary Enrique Manalo nga agpaay ti microsite a sentro a pagtaudan ti impormasion ken dagiti pagtaktakderan ti Filipinas maipanggep iti West Philippine Sea ken kasta met "dagiti kontribusion ti award iti panagari ti linteg ken iti nainkappiaan a pannakaareglo dagiti pagsusupiatan" babaen ti United Nations Convention on the Law of the Sea (UNCLOS) ken internasional a linteg.
Addaan ti microsite kadagiti link kadagiti impormasion a pakairamanan ti material a naidatag iti tribunal a pinalubosanen ti Permanent Court of Arbitration a makita wenno mabasa ti publiko; dagiti palawag wenno pakaammo ti DFA iti South China Sea Arbitration; ti legal ken heograpiko a masakupan ti West Philippine Sea; dagiti sungbat kadagiti naynay a masaludsod, kdp.
Mabalin a bisitaen ti microsite iti https://sites.google.com/dfa.gov.ph/wpstest/home. (Joseph Pedrajas/MANILA BULLETIN)
