Inkari ni Department of Justice (DoJ) Secretary Crispin C. Remulla a madusanto dagiti kameng ti gobierno a nakaaramid iti panagabuso iti operasion kontra droga iti napalabas nga administrasion.
Iti naangay a miting ti 5th United Nations Joint Programme Steering Committee itay Hulio 12, 2023 nga indauluan ti UN Resident Coordinator in the Philippines Ambassador Gustavo Gonzales, impanamnama ni Remulla a saan a palabsen ti DOJ dagiti panagabuso ti uray asino man nga addaan akem iti gobierno mainaig iti operasion kontra droga.
Segun ken ni Remulla, kayat a maammuan ti UN ti maipapan iti drug war ti naglabas nga administrasion, no ania ti kayat nga aramiden ti agdama nga administrasion kadagiti panagabuso, ti pannakasalaknib dagiti biktima, ken no ibilang ti gobierno a ti parikut ti droga ket isyu ti salun-at.
Segun kadagiti naipablaak a report, nasurok 6,200 a tao ti napapatay iti agarup 233,300 a naiwayat nga operasion kontra iti ilegal a droga manipud iti Hulio 1, 2016 agingga Marso 31, 2022.
TURISMO: Intayon Idiay Ayuyang Garden iti Pila, Siudad ti Laoag!
Innayon ni Remulla nga adda iti gobiernotayo ti pangngeddeng no palubosanna ti kayat ti UN, ngem amangan no nalabes metten ti panakibiang daytoy.
(Jeffrey Damicog/Manila Bulletin)
