Inyalnag ti Manila Bulletin (MB) ti maysa a tignay nga adbokasia, ti Scam Watch Pilipinas wenno #ScamWatchPH, a mangsuportar iti cybersecurity wenno kinatalged ti panagusar iti teknolohia ti kompiuter. Panggep daytoy ti mangipaganetget kadagiti Filipino a salaknibanda ti bagbagida manipud kadagiti cyber fraud ken online scam.
Maisayangkat ti #ScamWatchPH babaen ti pannakitinnulong kadagiti ahensia ti gobierno ken dagiti brand partner ti MB.
Proyekto ti MB Technews ti nasao a tignay, tapno mapagbalin daytoy a seksion ti MB a kas technology advocacy channel. Idauluan daytoy kas co-lead convenors da MB TechNews Editor Art Samaniego ken Jocel de Guzman, nangpundar ken presidente kabarbaro a kompania a Truth360.
Maysa a kangrunaan a paset ti #ScamWatchPH ti pannakaedukar ken pannakaipakaammo babaen ti panangipaay kadagiti praktikal a pammagbaga no kasano a mabigbig ken maliklikan dagiti scam, saan a dagus a panamatpati kadagiti maawat a mensahe, panangberipikar no lehitimo ti maysa a website, ken ti pannakasalaknib ti personal nga impormasion iti online.
Usaren ti #ScamWatchPH ti maysa a reporting tool a pagandaren ti maysa nga AI system a maawagan iti ScamGuard, a dinebelop ni Alvin Veroy. Dandanin malpas daytoy a tool a maipresentarto iti Department of Information and Communication Technology (DICT), National Privacy Commission (NPC), ken Cybercrime Investigation and Coordinating Center (CICC) tapno maipadas. (MANILA BULLETIN)
