Inlawlawag dagiti eksperto iti medisina ti konsepto ti kinatibker ken ti pateg daytoy iti biag dagiti agtutubo, iti webinar a "Kaya Mo, Kaya Ko, Kaya Natin Ito: Resilience Among Young People," nga indauluan ti University of the Philippines (UP) idi Hulio 14, 2023.
Kadanggay ti National Telehealth Center (NHTC), napagsasaritaan ti pateg ti addaan nauneg a pannakaawat kadagiti karit ti biag a sagsagrapen dagiti agtutubo ket makasursuroda iti praktikal a pamuspusan a makatulong iti panagtibkerda.
Kinuna ni Dr. Cynthia Leynes, Professor Emeritus ti UP Philippine General Hospital (PGH) iti Department of Psychiatry and Behavioral Medicine (DPBM), no adda parikut dagiti agtutubo, dakdakkel ti posibilidad nga agaramidda kadagiti narisgo a banag, aglanganda iti pagadalan ken tagibassitenda ti panangbuangay ken panangipateg iti relasion.
Inlawlawag ni Leynes a masapul a "mabangon ti natibker a karirikna" kadagiti agkabanuag bayat iti kaaddada iti proseso ti panagadal tapno umno ti panangsarangetda kadagiti parikut.
Manipud Kadagiti Agdama a Kameng ti Bannawag: Dios ti Agngina!
"Tapno agbalin a natibker, nasken a kitaenyo dagiti babassit a banag iti biag a mangted kadakayo iti ragsak, ta tulongannakayo a mangbaliw iti paniriganyo iti biag," kinuna ni Leynes. Innayonna pay a nasken a mangsukay dagiti agtutubo iti positibo a rikna ken ipamuspusanda ti agtultuloy nga agbiag iti laksid dagiti bangen.
"Ipamaysayo no ania ti rumbeng nga aramidenyo ita, diyo pagdanagan no ania ti sumangbay," kinuna pay ni Leynes.
Segun ken Dr. Norieta Balderrama, Associate Professor ti UP DPBM, dagiti natibker a tao matmatanda ti bagida kas natalged, makabael, ken makaay-ayo.
Innayon ni Balderrama, ti panangisuro kadakuada iti panangsaluad ti bagida, panagplano, ken pannakaawat iti parikut ti mamaglaing kadakuada ken mangipaay iti praktikal nga estratehia tapno ad-adda pay a bumilegda.
Inggunamgunam ni Balderrama a ti sekreto ti natibker a panagbiag ket ti pannakagun-od ti suporta babaen iti panangyebkas iti rikna kadagiti kasinged.
"Iti sango ti adu a pakarigatan, nasken nga agplano ken sirmataen ti balligi, ital-o ti panagraem iti bagi, parayrayen ti kompiansa iti bagi, sursuruen nga iturayan ti stress babaen iti nasayaat a panagdesision, sursuruen ti agdawat iti tulong, ken sursuruem nga ipakita ti kinasiasinom," imbatad ni Balderrama. (Rhowen Del Rosario/MANILA BULLETIN)
