Anamongan ti 75% dagiti Filipino ti pannakapatibker iti singgalut ti militar ti Filipinas ken US iti tengnga ti tension ti seguridad iti West Philippine Sea (WPS).
Daytoy ti kinuna ni Senate President Juan Miguel “Migz” Zubiri maipapan iti imbatad ti kaudian a surbey ti Pulse Asia a 75 a porsiento dagiti Filipino ti umanamong iti panangtinnulong ti militar ti gobierno ti Filipinas ken ti nabayagen a kaduana iti Asia-Pacific, idinto a 14% laeng ti saan nga umanamong.
Iti surbey a naiwayat manipud iti Hunio 19 agingga iti Hunio 23, 2023, nasaludsod kadagiti nasurbey: "Paborka kadi wenno saan iti pannakapatibker ti singgalut wenno panagtinnulong ti militar ti US ken FIlipinas iti tengnga ti tension ti seguridad iti WPS?"
Segun ken ni Zubiri, 75 porsiento dagiti pabor, idinto a 14 porsiento ti saan a pabor; 86 porsiento ti naggapu iti National Capital Region (NCR), 69 porsiento iti Luzon, 83 porsiento manipud iti Visayas, idinto a 76 porsiento iti Mindanao.
Manipud Kadagiti Agdama a Kameng ti Bannawag: Dios ti Agngina!
Imbatad pay ti surbey a 80 porsiento kadagiti umanamong ti manipud iti economic class A, B, C (upper class, upper middle class, and middle class); 76 a porsiento manipud iti class D (lower middle class), ken 70 porsiento ti naggapu iti class E (lower class).
Kinuna ni Zubiri a dayta ti gapuna nga inanamonganna ti singasing ni Sen. Risa Hontiveros a mangsangal koma ti Senado iti resolusion a mangkiddaw iti gobierno a mangidiaya iti protesta iti The Hague a nangipaulog iti arbitral ruling iti West Philippine Sea ken nangbibig iti kalintegan ti Filipinas iti Exclusive Economic Zone (EEZ) daytoy.
Indiaya ni Hontiveros ti Senate Resolution Blg. 659 a mangkiddaw iti gobierno ti Filipinas, babaen ti Department of Foreign Affairs (DFA), a mangidatag ti resolusion iti UN General Assembly a mangpasardeng iti panangriribuk ti China kadagiti barko ti Filipinas iti WPS.
Kinuna ni Zubiri a dakamatendanto ti nakuna a resolusion inton Hulio 25, kalpasan ti maikadua nga State of the Nation Address (SONA) ni Presidente Ferdinand “Bongbong” Marcos Jr.
"Kayatko a sawen, makapungtoten dagiti kakailiantayo, makapungtotdan iti China. Makaungetdan. No saanda a kagura ti China, ti porsiento nga imbasak ket basbassit koma," kinuna ni Zubiri iti interbiu ti DZBB.
Innayon ni Zubiri, "Mapunnuandan iti panangraut ti China iti pagiliantayo, nangruna iti Reed Bank nga asideg iti Coron, Palawan."
"Ipakitatayo amin a protesta nga indatagtayo, amin a ladawan, maiparangto iti United Nations (UN) tapno dumawattayo iti baro a pangngeddengda mainaig kadagiti maulit-ulit a panangriribuk ken idadap-aw ti China iti teritoriotayo," innayon pay ni Zubiri.
"Saantayo koma nga agpatingga laeng iti Arbitral Ruling no di ket surnadantayo iti The Hague no ania a talaga ti mapaspasamak iti China.
Sakbay daytoy, impaganetget ti Chinese Embassy a saan a bigbigen ti China ti arbitral ruling iti WPS ket indeklarana daytoy nga "ilegal, mawas, ken kawaw." (Hannah Torregoza/Manila Bulletin)
