Imbes a maipasardeng ti Mother Tongue-Based Multi-Lingual Education (MTB-MLE), indagadag ti maysa a grupo dagiti mannursuro a papintasen koma ketdi ti gobierno ti pannakaipatungpal daytoy.
"Nalaklaka a makasursuro dagiti ubbing a mangrugrugi pay laeng nga ageskuela no ti lengguahe a maaramat iti panangisuro ket ti lengguahe nga ammoda ken us-usarenda iti inaldaw," kinuna ni Teachers' Dignity Coalition (TDC) National Chairperson Benjo Basas.
Binigbig ni Basas a ti pannakairaman ti MTB-MLE iti K to 12 Basic Education Curriculum ket dakkel nga irarang-ay saan laeng nga iti edukasion no di pay ket iti sosiokultural a konteksto.
Segun iti paglintegan a sinangal ti Kongreso, mabigbig dagiti nadumaduma a lengguahe ti pagilian ken naipatalged ti pasetda kadagiti institusion ti edukasion iti entero a pagilian.
Manipud Kadagiti Agdama a Kameng ti Bannawag: Dios ti Agngina!
Kinuna ni Basas a nupay dua laeng ti opisial a lengguahe iti pagilian - ti ganggannaet nga Ingles ken ti Tagalog-based a Filipino - dagiti pagsasao ket saan a naikulong kadagiti dua a dominante a lengguahe gapu ta adda ginasgasut a lengguahe nga us-usaren dagiti Filipino iti inaldaw.
Ilunglungalong ti TDC ti pannakaitultuloy ti MTB-MLE idinto a binigbigda met nga adda nagkurangan iti pannakaipatungpal daytoy.
Kinuna ni Basas a kalpasan ti adu a tawen a pannakaiwayat ti MTB-MLE, saan a natungpal dagiti nanamnama a maaramid. Adu pay ti pammabalaw dagiti nagannak, politiko, agpampanday-linteg, kameng ti DepEd, ken uray dagiti mannursuro iti nagkamtudan daytoy.
Impaganetget ni Basas a maipamaysa koma ngarud a maatur dagiti makitkita a biddut iti programa a saan ketdi a maipasardeng.
Segun ken ni Basas, ti kultural a pakabigbigan a kangrunaan a nairepresentar iti nakayanakan a pagsasaotayo ket napateg a paset ti kinatao ken pakabigbigantayo a kas Filipino. Ngarud, di rumbeng a mapukaw daytoy gapu iti panangiparit kadagiti ubbing nga agusar iti nakayanakanda a pagsasao iti panagadalda.
Innayon ni Basas a maibatay iti linteg, pagrebbengan ti estado, kangrunaanna iti sistema ti edukasion, a pagtalinaeden, itandudo, ken pabaknangen dagiti lengguahetayo a tawidtayo. (Merlina Hernando-Malipot/Manila Bulletin)
