Pinirmaan ni Presidente Ferdinand Marcos Jr. ti Maharlika Investment Fund (MIF) a binigbigna a "napateg unay a panglakagan" para iti panagdur-as ti ekonomia ti Filipinas.
Nagbalin a kontrobersial ti nasao a fund sipud pay naigakat daytoy iti Kongreso ken Senado gapu kadagiti dillaw manipud iti nadumaduma a sektor. Iti panamagbalinnan a linteg iti MIF, impasingked ni Marcos a saan a politikal amin a desision para iti fund.
"Siguraduentayo a maipataray a nalaing ti fund," kinuna ni Marcos. Innayonna nga adu dagiti oportunidad a saan a rebbengna a mapalusposan isu a kasapulan a maiwayat ken maisayangkat ti MIF.
Iti panagbalinen a naan-anay a linteg ti MIF, addaanen ti Filipinas iti masindadaan a pondo a mangipaay iti pagpuonan a kuarta ken tapno makaawis iti dadduma pay a panagipuonan.
Manipud Kadagiti Agdama a Kameng ti Bannawag: Dios ti Agngina!
Kinuna ni Marcos a palubosan ti MIF ti Filipinas a makipartisipar kadagiti napateg a panagipuonan nga awan mainayon a panagutang.
Ingganetgetna a ti MIF ket "kasapulan unay a panangisayangkat" a mangsuportar iti kadagupan a panggep nga 6 ket kagudua agingga iti 8 a porsiento a panagdur-as ti gross domestic product iti medium term.
Innayon ni Marcos a babaen ti fund, mapapardas ti pannakayimplementar ti 194 a maipangruna a proyekto nga impraestruktura nga inaprobaran ti National Economic and Development Board.
Kinuna pay ni Marcos nga addaan itan ti pagilian iti pondo a "pagkakuartaanna a mismo ti bagbagina" tapno mapadakkel ti kapasidad ken kapabilidad ti gobierno a mangipuonan iti amin a "napapateg unay a proyekto" a kas kadagiti panagipuonan iti agrikultura, impraestruktura, digitalization, panangpapigsa kadagiti supply chain, ken kadagiti amin a napateg nga elemento ti post-pandemic nga ekonomia.
Impatalged ni Marcos a no la ketdi matarawidwidan a nalaing ti fund, saan nga agpalia daytoy.
"Mamatiak nga addaantayo kadagiti kalalaingan nga economic manager iti gobierno ken iti pribado a sektor a mapangnamnamaantayo a mangipataray a siaannayas iti daytoy a fund," kinunana.
"Ipasiguradok a daytoy a fund, imatonan dagiti mapagtalkan a personnel nga addaan iti nasayaat a track record ken naisangsangayan nga integridad," innayonna.
Manamnama nga ipaayan ti MIF ti gobierno iti napaut a pagtaudan ti pagganaran a mangsuportar kadagiti sumarsaruno pay a henerasion. Palukayen pay daytoy ti rikut ti mangbukel iti nailian a badiet babaen ti pannakaipaay ti nayon a pondo para kadagiti dadduma pay a prioridad a proyekto ti gobierno. (BETHEENA UNITE/Manila Bulletin)
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti dadduma pay a detalye, kontaken ti circulation department iti 8527-8121 Loc. 369, 09171360110 wenno ag-email iti [email protected].
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/bannawag.magazine
Facebook Public Group: https://www.facebook.com/groups/1668855693563462.
Dios ti agngina.
Isip pabaknangen, Bannawag ti basaen!
