Kiniddaw ti Alliance of Concerned Teachers (ACT) Private Schools ken ni President Ferdinand “Bongbong” Marcos Jr. nga ikeddengna koma no ania ti kababaan a sueldo dagiti mannursuro iti pribado a pagadalan wenno maipada koma iti sueldo ti agdadamo a mannursuro iti publiko a pagadalan.
"Pareho dagiti pagrebbenganmi, ken tumultulongkami met a mangtentenneb iti masakbayan dagiti agtutubo ti pagiliantayo; ngarud, maiparbeng a pareho laeng ti maawatmi a kas kadagiti mannursuro iti publiko a pagadalan," kinuna ni ACT Private Schools Secretary General Jonathan Geronimo itay Hulio 17, 2023.
Segun ken ni Geronimo, bigbigen ti linteg dagiti pribado a pagadalan a katinnulong ti Estado iti pannakaipaay ti dekalidad nga edukasion, ket pagrebbengan ti gobierno a salakniban ti kalintegan ken pagimbagan dagiti mannursuro iti pribado a pagadalan.
Dinakamat ni Geronimo ti resulta ti maysa a surbey a naiwayat kadagiti mannursuro iti 73 a pribado a pagadalan iti entero a pagilian manipud iti Hunio 5 agingga iti 30, 2023 tapno maammuan ti kasasaad dagiti mannursuro iti pribado a pagadalan.
Manipud Kadagiti Agdama a Kameng ti Bannawag: Dios ti Agngina!
Segun iti surbey, kaaduan kadagiti mannursuro kadagiti pribado a pagadalan ti umaw-awat iti nababa unay a sueldo.
Kinuna ti ACT Private Schools a 64.2 a porsiento kadagiti nasurbey ti naammuan nga agsusueldo laeng iti PhP27,000 binulan, nababbaba nga amang ngem iti entry-level a sueldo dagiti mannursuro iti publiko a pagadalan.
Imbatad ni Geronimo a nabayagen nga ib-ibturan dagiti mannursuro kadagiti pribado a pagadalan ti nakas-ang a kasasaadda gapu iti nakaro a deregulasion ti sistema ti pribado nga edukasion ken ti nakurang a panangsalaknib ken panangsuportar kadakuada ti gobierno.
Kinuna ni Geronimo a panawenen a maipaulog ti Magna Carta for Private School Teachers tapno masalakniban ti kalintegan ti sektor ti pribado nga edukasion.
(Merlina Hernando-Malipot/Manila Bulletin)
