Indagadag ni Department of Health (DOH) Undersecretary Eric Tayag itay Hulio 17 kadagiti lisensiado a Filipino a nars nga agtrabaho iti pagilian tapno mapunno ti panagkurang iti nars iti pribado ken publiko nga ospital.
"Kasapulannakayo ti pagilian. Umaykayon ta ur-urayendakayo iti nabayag a panawen. Daytoyen ti gundawayyo nga agserbi kadagiti pribado ken publiko nga ospital," kinuna ni Tayag.
Inyebkas pay ni Tayag ti namnamana nga agaplay dagiti nars iti mastrekan a panggedan iti Filipinas, ngem inaklonna a saan a mapilit dagiti nars nga agtalinaed iti pagilian, ta adda met kayatda a magun-od iti biagda.
Sakbayna, impakaammo ni DOH Secretary Teodoro "Ted" Herbosa nga adda nasurok 4,500 bakante a posision kadagiti ospital ti gobierno nga agpaay kadagiti lisensiado a nars.
Manipud Kadagiti Agdama a Kameng ti Bannawag: Dios ti Agngina!
Impakaammona pay ti pannakabukel ti "nursing advisory council" nga idauluan ti "chief nursing officer" a mangimaton ken mangtingiting kadagiti pakaseknan dagiti nars.
(Luisa K. Cabato/Manila Bulletin)
