Indatag ni Overseas Filipino Workers (OFW) Party-List Representative, Assistant Minority Floor Leader Marissa "Del Mar" Magsino, ti House Resolution 1105 a mangdagdag iti Kongreso a mangadal iti pagannurotan ti gobierno iti airline industry ken iti operasion dagiti eropuerto tapno mataming ti reklamo ti publiko mainaig iti pannakataktak ken panakakanselar ti biahe iti eroplano.
Manamnama a babaen ti HR 1105, marugian ti imbestigasion a mangtulong iti pannakasangal ti linteg mainaig iti pannakapasayaat ti airline industry apaman nga aglukat ti Kongreso inton Hulio 24, 2023.
Kinuna ni Magsino a gandat ti HR 1105 a solbaren ti nakaay-ay-ay a padas dagiti Overseas Filipino Workers (OFW) a kanayon a biktima ti pannakataktak wenno pannakakanselar ti biahe ti eroplano.
“Kalikagumantayo a dagiti airline operator, mangted koma iti umdas a panawen, uray dua nga aldaw koma, a panangipakaammo kadagiti pasahero a maitantan wenno makanselar ti biaheda ket maobligar koma dagiti kompania ti eroplano a tulonganda dagiti pasaheroda a mangi-book iti flight-da iti sabali nga airline, no adda kasta a mapasamak,” kinuna ni Magsino.
Manipud Kadagiti Agdama a Kameng ti Bannawag: Dios ti Agngina!
Kinuna pay ni Magsino a panawenen a repasuen ken tingitingen ti Kongreso dagiti protocol, annuroten iti panagbiahe iti eroplano ken operasion iti eropuerto, ken masierto ti pannakaipatungpal ti air passenger bill of rights tapno manamnama ti pannakasalaknib dagiti pasahero ti eroplano iti Filipinas.
Innayon ni Magsino nga adun nga OFW ti naawanan ti trabaho ken nagbayad iti penalty gapu iti naladaw nga isasangpetda iti trabahoda iti ballasiw-taaw gapu iti pannakaitantan ken pannakakanselar ti flight.
"Kayattayo nga amirisen dagiti masapul a mabaliwan tapno masalakniban dagiti pasahero, saan laeng nga agpatingga kadagiti OFW, no di ket agraman dagiti Filipino ken ganggannaet a biahero," kinuna ni Magsino. (Manila Bulletin)
