Indatag ni Senate Committee on Basic Education Chairman Sherwin Gatchalian ti maysa a resolusion a mangidagadag iti pannakarepaso koma ti Mental Health Act wenno Republic Act No. 11036.
Kinuna ni Gatchalian a masapul a maammuan no kasano ti pannakaipatpatungpal daytoy a linteg gapu iti umad-adu a bilang dagiti agpakpakamatay iti napalpalabas a tawen.
"Idinto a rumsua ti pandemia maipanggep iti salun-at ti panunot (mental health), masapul a madagdag ti gobierno nga agtignay babaen ti panangpasayaat iti pannakasaluad ti mental a salun-at," kinuna ni Gatchalian iti panangidatagna iti Senate Resolution Blng. 671.
Naibasar iti datos ti Philippine Statistics Authority (PSA), napaliiw ni Gatchalian a sakbay ti pandemia, 2,752 ti bilang dagiti nagpakamatay manipud idi 2017 agingga idi 2019, idinto a nagbalin a 4,085 manipud idi 2020 agingga itay napan a tawen (2022).
TURISMO: Intayon Idiay Ayuyang Garden iti Pila, Siudad ti Laoag!
Iti panagsasarita dagiti kameng ti Senate Committee on Health and Demography idi Mayo 9, 2023, imbatad ni Gatchalian nga adda 3,125 nga awag a naawat ti National Center for Mental Health (NCMH) idi 2019, ket 700 kadagitoy ti mainaig iti panagpakamatay.
Nupay adu ti agkasapulan iti serbisio ti mental a salun-at, adu ti saan a makabael gapu iti kinanginana," kinuna ni Gatchalian.
Makatulong ti panangrepaso ti Senado iti panangammo kadagiti parikut iti panangipaay iti serbisio para ti mental a salun-at, panangusig iti kinaepektibo ti agdama a pagalagadan, ken panangisayangkat iti annuroten tapno malapdan ti ikakaro ti pandemia ti mental a salun-at iti Filipinas," innayon ni Gatchalian.
(Hannah Torregoza/Manila Bulletin)
