Salaysay ni VILLAMOR C. VISAYA JR.
MAYSA a milagro ti Dios ti pannakalasat ni Julieva ‘Julz’ Benlingan, 33, domestic helper idiay Hatay, Turkey, iti pannakairamanna kadagiti adu a naapektaran ti 7.8-magnitude a ginggined iti Turkey ken Syria idi Pebrero 6. Dayta ti impaganetget ti inaunaan a kabsat ni Julieva a ni Maribel Benlingan-Liyab iti pannakiuman daytoy a mannurat.
Mapapati a pinanawan ti amona ni Julieva gapu ta ipagarup daytoy a natayen kalpasan a magaburan iti narba nga apartment-da iti Hatay, maysa kadagiti lugar a napakaruan a naginggined.
“Kinuentami ti oras no kasano ti kapaut nga adda ni Julz iti sirok dagiti rebba,” kinuna ni Maribel, 44, nga agnanaed iti Lagawe, Ifugao. “Agarup 60 nga orasna nga adda sadiay. Idinto a ti amona, siam nga oras met sakbay a nasarakan dagiti immarayat. Nabati ni Julz ta dida nasarakan ti yanna iti narba a pasdek.” Innayonna a, “milagro dayta ti Dios, isu a napalaus ti yamanmi iti maikadua a biag ti kabsatmi.”
Agsolsolo nga ina ni Julieva. Adda maysa nga anakna a babai nga agtawen iti 12 manipud iti dati a karelasionna. Kinuna ni Maribel a nagtrabaho ni Julieva iti ballasiw-taaw a kas domestic helper tapno masuportaranna ti anakna. Tallo a tawen ni Julieva iti Hong Kong. Idi agangay, nag-cross country idiay Turkey. Uppat a tawennan iti daytoy a pagilian.
Ket Itartarayanmi Dagiti Bomba
Iti ospital, malaksid kadagiti saan met unay a nakaro a sugat iti ulo, rupa, ken saka, ken pannaka-dehydrate-na, awan ti naduktalan dagiti doktor a kritikal a dunor ni Julieva.
Sakbay a masarakanda ni Julieva, inawagan ti amo daytoy ni Maribel ket impakaammona a pinanawandan ni Julieva iti narba nga apartment ta impagarupda a natayen daytoy iti kabayagnan a napandagan. Impadamag pay ti amo a sapsapulen dagiti dua nga annakna nga aywan ni Julieva, ti patpagenda a yaya.
“Idi immawag kadakami ti amona ket nag-sorry iti pannakapukawmi iti kabsatmi, imbagak kenkuana a no dina nakita a mismo a natayen ni Julieva, saankami a mamati nga awanen ti kabsatmi,” kinuna ni Maribel. Innayonna a napasnek nga inkararagda a sapay koma ta masarakandanto met laeng a sibibiag ti kabsatda.
Iti 9:30 ti rabii (oras ti Filipinas) ti Pebrero 8, nasarakan met laeng dagiti rescuer ni Julieva.
Insalaysay ni Julieva kadagiti kakabsatna a dandani kanon mapukaw ti namnamana a makalasat pay iti pannakaipitna iti rebba. Mangmangngegna ti arimbangaw dagiti rescuer iti ngatuenna ket nagpukpukkaw tapno agpatulong. Ngem saanda a nangngeg ta nauneg ti yanna.
"Natupakan ket napandagan dagiti sakak, nayipit pay ti ulok, ken diak unay magaraw dagiti imak tapno agarinsawadak koma iti mabalinko a buraken wenno iwadag dagiti nakapandag kaniak,” kinuna ni Julieva. “Pinilitko nga ikuti ti ulok ngem diak talaga makagaraw ta naipasngat ti ulok, agsumbangir ti pannakaipitna."
Gapu ta saan a mangngeg dagiti rescuer, pinadas manen ni Julieva nga inggaw-at ti maysa nga imana agingga a nakaarikap iti metal a banag. Daytoy ti impatpatitna, agingga a natimud met laeng dagiti rescuer.
"Nangngegko dagiti tattao nga agpupukkaw iti ‘adda tao, adda tao dita’ iti pagsasaoda,” kinuna ni Julieva. “Sinungbatak met iti ‘addaak ditoy, addaak ditoy, tulongandak!' Insangitko ti nagpatulong.”
Nabayag met sa nasarakan ken nawalinan dagiti rescuer ti yan ni Julieva. Intarayda a dagus iti ospital idi maalut-otda.
Nagtultuloy ti panaglaing ni Julieva iti ospital agingga a rimmuaren. Iti pannakasursurat daytoy a salaysay, adda ni Julieva iti balay ti maysa a gayyemna a Turkish tapno sadiay nga agpaimbag.
Mangnamnama ti pamilia Benlingan a tulongan ti gobierno ti Filipinas nga agawid ni Julieva inton malainganen a mamimpinsan.
"No naan-anayen a maimbaganak, sapay koma ta matulongandak nga agsubli iti Filipinas,” kinuna ni Julieva. Indawatna a mapalubosan koma met nga umay sumarungkar kenkuana iti Turkey ti anakna kabayatan nga agpapaimbag ta mailiw unayen iti daytoy.
Para ken Julieva ken ti pamiliana, maikadua a biag ti adda kenkuana ita ket naynay nga agyamyaman iti Namarsua iti milagro a pannakaisalakanna. --O
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti dadduma pay a detalye, kontaken ti circulation department iti 8527-8121 Loc. 369, 09171360110 wenno ag-email iti [email protected].
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/bannawag.magazine
Facebook Public Group: https://www.facebook.com/groups/1668855693563462.
Dios ti agngina.
Isip pabaknangen, Bannawag ti basaen!
