Babaen ti Proclamation No. 297 a naipaulog idi Hulio 21, 2023, winaswasen ni Presidente Ferdinand "Bongbong" Marcos Jr. ti Covid-19 State of Public Health Emergency iti entero a Filipinas gapu iti agtultuloy a panagrasay ti bilang ti kaso ti COVID-19, ken gapu iti napabileg a resistensia dagiti umili kontra iti virus.
Idi Mayo, imbatad ti International Health Regulations (IHR) Emergency Committee ti World Health Organization (WHO) ti rumasrasay a bilang dagiti mayospital wenno matay gapu iti Covid-19, kasta met ti pimmigsa a resistensia dagiti tattao kontra iti SARS-CoV-2.
Inkeddeng ni WHO Director-General Tedros Adhanom Ghebreyesus a saanen a maibilang a "public health emergency" iti sangalubongan ti Covid-19. Nupay kasta, imbalakadna ti pannakaiwayat latta ti agpaut a panangtaming iti angol a COVID-19.
Kinuna ni PBBM a nupay serioso a pakaseknan latta ti publiko ti COVID-19, nagtalinaed nga umdas ti kapasidad ti healthcare system ti pagilian.
Manipud Kadagiti Agdama a Kameng ti Bannawag: Dios ti Agngina!
Maibasar iti Proclamation No. 297, mawaswas aminen a pagalagadan a naipatungpal idi adda pay ti State of Public Health Emergency ti pagilian, malaksid iti emergency use authorization (EUA) nga impaulog ti Food and Drug Administration (FDA) a makatawen pay a maipatungpal tapno maibus dagiti nabatbati a bakuna.
Segun iti proklamasion, magutigot amin nga ahensia a dagiti pagalagadan ken regulasionda, nasken a mayannurot iti pannakawaswas ti State of Public Health Emergency, kas maiparbeng.
Argyll Cyrud Geducos/Manila Bulletin
