Lima a Daniw ni HONOR BLANCO CABIE
1
Sarukod 'toy karkarma
natarnaw pay la dagidiay mata
apok nga agpaltopaltog abayko,
TURISMO: Intayon Idiay Ayuyang Garden iti Pila, Siudad ti Laoag!
ti la'dda nga ar-aramidenna.
ruk-atanna daddumat' panana,
agsagawisiw met panunotko
mangtaltaldiap iti itsurana.
immun-una daytay aramidna
a nangriing kaniak 'ti turogko,
boksitko 'tay nagsappaalanna.
ginammatanna dagus imak dua
ta manibelan 'diay dakulapko,
ragsaknan ta inlag-ulag-oyna.
makaturturogak, ay! ngem ania
ngarud madlawko nakaad-adu
saludsod nga ipalpalladawna.
diak met maungtan, 'diay aramidna
isut' palma, sabsabong mugingko,
manen umasideg, saludsodna
mangted 'ti sarukod 'toy karkarma.
2
Musikoak
musikoak*
pagpampannakkelko
saguday a naidumduma
do re mi fa sol sol fa mi re do
allegro andantino fortissimo mosso
panaggunggunay ken panagkidkidday
notnota a nakangisngisit pay addaan ipus**
magusgustuanda alla panagkulkulagtit dilak
wangawangan wen wangawangan basa a bokilia
addaan talugading kunkunada daytoy a trombonista.
~matmatanyo~
trombonista a daytoy kunkunada talugading addaan
bokilia a basa wangawangan wen wangawangan
dilak panagkulkulagtit alla magusgustuanda
ipus addaan pay nakangisngisit a notnota
panagkidkidday ken panaggunggunay
mosso fortissimo andantino allegro
do re mi fa sol sol fa mi re do
naidumduma a saguday
pagpampanakkelko
musikoak.
*musiko ti umdas nga awag iti ilokano (iloko), saan
a musikero nga ar-aramaten dagiti tagalog ken
dadduma a nayaw-awan nga ilokano.
*8th note (american) wenno quaver (british), ti
pannakapuyotna maysa nga apagkawalo iti kapaut ti
maysa a sibubukel a nota (whole note) wenno semibreve.
pagdagupan daytoy ti mamindua a pakabuklan ti maysa
a 16th a nota.
3
no anniniwan 'ti malem daytay
agar-ardangen 'ti wasnay dana
saanmo a kaaliaw buyana
wenno palugodan panagliday.
saanka nga agam-amak, ketdi
ikkam santiguarna 'ta mugingmo
tapno pumigsa 'ta panunotmo
iti idadateng ti rabii.
panaglennek 'diay init ta adda
yar-arasaasna di pagbutngan:
iti labes sardam, adalem pay
a rabii pumigsantot' rikna.
baro nga aldaw addanto't pagnaan,
maep-epton am-amin a liday.
4
Kunada, Villanelle, Naatapka
kunada, villanelle, naatapka
kasla maysa a saksakulap 'diay
ublag kayatda matiliw koma.
agganggandat makatiliw kenka
adda tabukolda nakaibaklay,
ngem, villanelle, itayabam ida.
gapuna a batibatka, dayta
daytay adda't murdong panagliday,
awan ti gasat 'diay tabukolda.
manon panagsipnget pinadasda
nga insaruag daydiay ibakbaklay,
isu latta awan 'tay gasatda.
ngem 'di siak 'tay immasideg kenka
dagdagus nga innak minurmuray,
linalailom pay 'toy karkarma.
saanakon a nagmalmalanga
nangruna 'di innak lininglingay,
insuronak, pati 'toy karkarma,
no kasano nga agmaymaysa ti dua.
5
iti ungtot' tambak ti talon 'diay
sang-at no panawen panagraep
iti sidiran dagiti bantay,
mannalon agyamyaman 'ti nepnep.
iti murdong uppat a metro ti
katayag a kawayan maipasdek
iti tambak agyaman ti puli:
panagraepda addaan pasnek.
kalasukos daytay inkabilda
'ti sabsabot, 'diay panagyaman 'tay
adda't kawayan nga intugkelda,
'tay atang a mangted panagrang-ay.
ugali da kalugarak innak
nabuya nangpapigsa't karkarmak.
