Impaay ti gobierno probinsial ti Ilocos Norte, babaen ti Provincial Social Welfare and Development Office (PSWDO), ti damo a social pension kadagiti person with disabilities (PWD) iti probinsia itay Hulio 21.
Maysa a programa ti Department of Social Welfare and Development ti social pension a pakaitedan ti binulan nga allowance kadagiti kualipikado a Filipino nga agtawen iti 60 ken agpangato tapno maipaayanda kadagiti nangruna a kasapulanda kas iti taraon, pagnaedan, pagan-anay, ken agas.
Babaen ti panangiganetget ni Governador Matthew Marcos Manotoc, nakailatang ti PSWDO iti pondo tapno mairaman dagiti Ilokano a PWD kas benepisiario ti social pension.
Impanamnama ni Gob. Marcos Manotoc ti agtultuloy a suporta kadagiti PWD iti probinsia. Segun kenkuana: "Isaganamin para iti sumaruno a tawen ti pannakaingato ti tulong (kadagiti PWD) ken makikoordinarkami kadagiti munisipio ken barangay tapno komprehensibo ti suporta kadagiti PWD." Innayonna a para daytoy iti "inklusibo a progreso, panagdur-as, ken panangituray."
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Ms. Carolyn Domingo, PSWDO Disability Affairs Officer, a "nagasat unay ti Ilocos Norte ta maysa daytoy kadagiti manmano laeng a probinsia iti pagilian a mangyimplementar iti programa a panagpension dagiti PWD.”
Nagyaman met ni Ms. Teresita Agustin, presidente ti Ilocos Norte Provincial Federation of PWDs, ken ni Gob. Marcos Manotoc iti pannakaipaay kadakuada iti gundaway a makaawat iti insentibo a kuarta para kadagiti nangruna a pakasapulanda.
Iti damo a pannakaiwaras ti pension, nangted ti gobierno probinsial iti 3,000 a pisos iti tunggal maysa kadagiti 200 nga indigent nga Ilokano a PWD a benepisiario. Lima gasut a pisos met ti maited a binulan kadagiti sumarsaruno a bulan.
Malaksid iti pension, isayangkat pay ti gobierno probinsial dagiti programa ti pannaipaay iti pagtrabahuan ken panagnegosio ken panagsanay iti financial literacy para kadagiti PWD tapno masustenaran ti pagbiaganda. (Kenneth Dhovan Natividad, PGIN-CMO)
