Imbatad ni Presidente ken Agriculture Secretary Ferdinand “Bongbong” R. Marcos Jr. nga agarup 1.8-milion a pamilia ti nagnumar iti 7,000 a Kadiwa Stores nga inwayat ti gobierno iti entero a pagilian.
Ti Kadiwa program nga imatmatonan ti Department of Agriculture (DA) ket proyekto ti gobierno a mangtulong kadagiti Filipino a mannalon babaen ti direkta a panaglako ken panaggatang kadagiti produkto iti agrikultura.
"Mapan a 1.8-milion a pamilia ti nagnumar iti nababa a presio dagiti tagilako. Iti dagupna, agarup PhP700-milion ti pategna a produkto ti nailako kadagiti Kadiwa stores a nangted met iti panggedan dagiti kameng ti nasurok a 3,000 a kooperatiba ken asosiasion," kinuna ni PBBM iti maikadua a State of the Nation Address (SONA) itay Hulio 24.
Segun ken ni PBBM, bimmaba ti presio dagiti magatgatang iti napalabas a bulan, ket dinakamatna ti dakkel a naitulong ti Kadiwa program iti pannakagun-od daytoy.
Manipud Kadagiti Agdama a Kameng ti Bannawag: Dios ti Agngina!
"Napintas ti nakitatayo a resulta, isu a pagsaknapentayo ti Kadiwa iti entero a pagilian," kinuna ni PBBM.
Innayonna a nagtitipon dagiti ahensia ti gobierno tapno mapatibker pay ti Kadiwa, malaksid a nakitinnulong ti sibubukel a sektor ti agrikultura ken dagiti lokal a gobierno.
Jel Santos/Manila Bulletin
