Bimmisita iti Ilocos Norte itay nabiit ni Nathaniel Alapide, maysa a Filipino a sand artist a nakabase iti Dubai, United Arab Emirates.
Iggem ni Alapide ti Guinness Book of World Record para iti kadakkelan a drowing iti kadaratan ti desierto nga inobrana iti 30 nga aldaw itay napan a tawen: ti mapa ti UAE ken dagiti dadaulo ti nasao a pagilian. Mapan a 23,000 square meters (2.3 nga ektaria) ti sinakup ti drowing.
Nangrugi ni Alapide nga agdrowing iti kadaratan idi 2014 idi nangidrowing iti imahen ti dakkel a kayo iti aplaya a kas pammadayawna iti apongna a baket.
Intultuloyna ti panagdrodrowingna iti kadaratan gapu ta segun kenkuana, addaan daytoy iti “meditative quality.” Kasta met a kunana a "naisangsangayan" ti artwork-na no maidilig kadagiti painting kadagiti galeria ta nairanta a mapaglinglingayan ti sand drawing ta saan nga agbayag daytoy.
Manipud Kadagiti Agdama a Kameng ti Bannawag: Dios ti Agngina!
Malaksid iti nai-Guinness nga obrana, indrowing pay ni Alapide ti "Mona Lisa" ni Leonardo Da Vinci ken ti imahen ni Lionel Messi, nalatak a player ti soccer.
Iti panagbakasionna iti Ilocos Norte, nagnaed ni Alapide iti Currimao. Pinasiarna dagiti umarngi iti desierto a lugar a kas iti sand dunes iti Barangay La Paz iti Laoag City.
"Nakitak ti darat iti beach, it was perfect," kinunana, ket nangidrowing iti ladawan ti maysa a babai iti aplaya ti Currimao. Kinuna pay ni Alapide nga umayto manen iti Ilocos Norte tapno agdrowing manen iti kadaratan. Segun kenkuana, "ti maris ti darat (ditoy), napintas ken perpekto para iti kastoy a klase ti artwork, isu a sigurado nga agsubliak tapno agdrowingak iti ad-adu pay." (Kenneth Dhovan Natividad, PGIN-CMO)
