Usaren ti ulo sagpaminsan.
Intulnog ni Sarina Bolden ti Team Filipinas ti umuna a puntos a nangyeg iti umuna a balligi ti Filipinas kontra iti New Zealand iti 2023 Federation Internationale de Football Association (FIFA) Women’s World Cup idi Hulio 25.
Iti laksid dagiti linasatna a pannubok sakbay a makagteng iti 2023 FIFA Women’s World Cup, impakita ni Bolden nga ammona no kaano a nasken a makapuntos.
Manipud iti free kick ni Angela Beard, naipasa ti bola ken ni Sara Eggesvik sakbay a napan ken ni Bolden.
Manipud Kadagiti Agdama a Kameng ti Bannawag: Dios ti Agngina!
Indungso ni Bolden ti ulona iti bola ket nagtarus daytoy iti goal box, a nangyeg iti umuna a puntos ti Filipinas, ken umuna a pangabak daytoy iti Women's World Cup a naimatangan ti 32,357 nga agbuybuya iti Wellington Regional Stadium.
Siiimatang met ti amangna nga Amerikano, ken ni Sherry Calpo nga inana, a nayanak iti Pangasinan.
"Kitaenyo ti aglawlaw, kasla ad-adu ti Filipino ngem Kiwi, anian a mangparayray iti pagilian. Kitkitaek dagiti isem iti rupada, dagiti ikkisda. Kasla idiay Manila ti nagay-ayamanmi. Pagarupek nga impakitada ti pudno a linaon ti pusoda. Impakita dagiti babbai ti kinadakkel ti pusoda," kinuna ni Coach Alen Stajcic iti maysa nga interbiu.
Nikole Javier/Manila Bulletin
