Nangitulod iti 17,000 a food packs ti Department of Social Welfare and Development (DSWD) iti uppat a bodega daytoy iti Cagayan Valley kas nayon a pangsaranay ti gobierno lokal (LGU) iti rehion a naapektaran ti Bagyo Egay (internasional a nagan: Doksuri).
Segun ken ni DSWD-Disaster Response and Management Group (DRMG) Assistant Secretary Marlon Alagao, 4,500 a food packs ti naideliber iti Santiago, Isabela; 8,000 a food packs iti Tuguegarao City, Cagayan; 1,500 a food packs iti Cabarroguis, Quirino; ken 3,000 a food packs iti Abulug, Cagayan.
Kinuna ni DSWD-Field Office II Regional Director Lucia Alan a 1,332 a pamilia wenno 4,322 a tao ti adda iti 75 evacuation centers iti Cagayan Valley.
Dagiti pamilia a naapektaran ti bagyo ken nakaro a nepnep wenno "habagat" ket nakaawaten ti agarup PhP1-milion a balor ti tulong manipud iti DSWD ken dagiti maseknan nga LGU.
Manipud Kadagiti Agdama a Kameng ti Bannawag: Dios ti Agngina!
Iti agdama, adda suplay a naipempen ken nakasagana a pondo ti DSWD nga agdagup ti PhP2.16-bilion a mabalin a maibunong kadagiti maseknan nga LGU, no kasapulan.
Ellalyn De Vera-Ruiz/Manila Bulletin
