Agyaman ti pamilia Cabie-Barquez ti Barangay Upon, Pinili, Ilocos Norte kadagiti amin a kalugaran, gagayyem ken kakabagian a nakipaglulualo, timmulong iti panagsangaili ken nakipagrikna iti ipupusay ni Eugenia Cabie-Barquez itay maika-13 ti Hulio daytoy a tawen.
Nagpumpon ni Eugenia, 91, itay maika 24-ti Hulio iti Pinili Municipal Cemetery kalpasan ti Requiem Mass nga inaramid ni Father Erwin Aquino ti Aglipay Memorial Church.
Ni Eugenia (Sept 12, 1931-July 13, 2023) ti balo ni dati nga Army 2nd Lt. Salvador S. Barquez (ret.), dati nga adjutant-post commandant ti Veterans Federation of the Philippines, tubo ti Polangui, Albay ngem nagnaed iti Upon, Pinili, idi nagretiro idi 1964 kalpasan ti nasurok a 25 a tawenna iti serbisio. a pakaibilangan ti panagopisinana iti headquarter ti Armed Forces of the Philippines iti dati a Camp Murphy (Camp Aguinaldo itan) iti Quezon City.
Inulila ni Eugenia, anak da Silvestre Cabie ti Pinili ken dati nga Aniceta Macabiog ti Maglaoi, Currimao, Ilocos Norte, dagiti annakna: Elena; Saturnino (Cecilia); Severino (Luz); Bonifacio+ (Nellie); Joseph (Alma); Gloria (Pastor Reynaldo Avante); Elvira (Eriberto Bayutas); Adela (Henry PH Yong); ken appoko nga agnanaeden iti Hawaii, Metro Manila, Toronto, Currimao, Gonzaga, Cagayan, ken Pinili.
Imbati ni Eugenia ti maymaysan a kabsatna, ni Natividad, balo daydi Hitler Vermudez ti ili met laeng a Pinili ken ti kaanakan ken appokona kenkuana.
Nagsangpet met dagiti appokona iti kabsatna a lalaki nga agnaeden iti Gonzaga, Cagayan, ken dagiti taga-Currimao a nakipamumpon a nakaibilangan ti kaanakanna a ni Pastor Crispulo Ablang ti Bulacan.
Napan met nakisinadag ti kaanakanna a ni Mayor Edward Quilala ti Currimao, anak ti dati a mayor met laeng ti ili a first cousin ni Eugenia, daydi Engr. Cirilo Macabiog Quilala, ken ti manugangna nga agdama nga SB member ti Currimao Judz Quliala.
Ni Eugenia ket first cousin ni Honor Blanco Cabie, agsursurat iti Bannawag ken dati a Presidente ti GUMIL Filipinas ken Gumil Metro Manila. (Maria Rosa A. Cabie)
