Limapulo ket lima a milion a subscriber identity module (SIM) card ti mapattapatta a na-deactivate wenno saanen a mabalin nga usaren kalpasan a naggibus ti nayalud-od a panagrehistro iti SIM card itay Hulio 25, segun iti Department of Information and Communications Technology (DICT),
Kinuna ni DICT Secretary Ivan John Uy, a kaaduan kadagitoy a SIM card ti saan nga aktibo a naus-usar a mabalin a nausar laeng iti naminsan wenno namindua sa nabaybay-anen a namimpinsan.
Inlawlawag ni Uy a dagiti agus-usar a saan a nakapagrehistro, saandan a mausar ti SIM card-da a pagawag, paginternet, wenno kadagiti serbisio ti e-wallet.
Nupay kasta, kinuna ni Uy a dagiti saan a nairehistro a SIM card, "mabalin pay laeng a makaawat iti SMS ((short message service)) wenno text ta naikkan dagitoy iti lima nga aldaw a grace period." Kinuna pay ni Uy a mabalin a ma-reactivate dagiti saan a rehistrado a SIM card iti uneg ti lima nga aldaw. Innayonna a "mabalinda pay a ma-recover ti bukodda a numero."
Manipud Kadagiti Agdama a Kameng ti Bannawag: Dios ti Agngina!
Sipud idi Hulio 24, segun iti National Telecommunications Commission (NTC), agdagup iti 105,917,844 ti nairehistro SIM card.
Nakairekord ti Smart Communications Inc. iti 49,990,446 a nagrehistro, ti Globe Telecom, Inc. iti 48,378,674; ken ti DITO Telecommunity Corporation iti 7,548,724. (Sonny Daanoy/ MANILA BULLETIN)
