Naipaulog iti State of Calamity ti probinsia ti Ilocos Norte idi Hulio 26 gapu iti nakaro a panaglayus ken napigsa nga angin a pinarnuay ti bagyo Egay.
Iti Special Session ti Sangguniang Panlalawigan ti Ilocos Norte nga indauluan ni Vice Gov. Cecilia Araneta-Marcos, sangsangkamaysa a naaprubaran ti Resolution No. 2023-07-173 a mangidekdeklarar iti State of Calamity iti probinsia.
Iti pannakaipasa ti resolusion, kinuna ni Provincial Board Member Dante Franklin Respicio a ginasut a milion a pisos ti balor dagiti nadadael iti agrikultura, impraestruktura, ken dadduma pay a sanikua, agraman dagiti residente a naawanan ti balay gapu iti bagyo.
Segun iti padamag ti Provincial Disaster Risk Reduction and Management Council (PDRRMC), naibakuit ti 203 a pamilia a buklen ti 668 a tao manipud iti nalayus ken nagreggaay a luglugar kas iti Bangui, Badoc, Bacarra, Pagudpud, Banna, Adams, Solsona, Piddig, Burgos, ken Paoay, ket dagiti siudad ti Batac ken Laoag ket nagkamang iti kaasitgan nga evacuation center gapu iti agtultuloy a pangta ti bagyo.
Manipud Kadagiti Agdama a Kameng ti Bannawag: Dios ti Agngina!
Madama nga agliklikmut ni Gov. Matthew Joseph Manotoc ken ti Provincial Disaster Risk Reduction and Management Council team kadagiti nadumduma nga evacuation center iti Pagudpud ken Bangui tapno masinunuo nga umdas dagiti kasapulan kas iti ules, tualia, ken tsinelas.
Feddie Lazaro ken Philippine News Agency/Manila Bulletin
