Salaysay ni CHARLIE P. PINTO
“Diosko, isalakannakami iti dakes! Mapattog san ti barko,” inkidem ti asawak a nagdumog.
Disiembre 14, 2021 idi ti rabii. Addakami iti M/V 2GO St. Francis Xavier iti baybay ti Romblon; agturongkami iti Manila. Napankami nagpasiar ken Mayleen a baketko kadagiti nadumaduma a lugar iti Mindanao. Idi agawidkamin, awan met barko a deretso nga agpa-Manila. Adda ketdi RoRo (Roll on, Roll off vessel) nga agpa-Cebu, ti M/V Starlight. Isun ti naglugananmi. Mangalakamton iti barko manipud iti Cebu nga agpa-Manila. Adda, isu daytoy ti M/V 2GO St. Francis Xavier.
Ngem mapattogkamin sa metten iti tengnga ti taaw!
Sakbayna, iti Disiembre 9, 2021, nagluaskami manipud iti Vigan nga agpa-Manila. Alas dies iti kabigatanna ti panagluganmi ti Cebu Pacific nga agpa-General Santos City. Natalna met ti panawen ditoy Ilokos. Saan a nagtudo. Saan met a naangin. Ngem impakdaar ti PAGASA a sumrek iti area of responsibility (AOR) ti Super Typhoon Odette nga addaan international name a Typhoon Rai iti rabii ti Disiembre 15 wenno parbangon ti Disiembre 16 iti paset iti Visayas ken akin-amianan a Mindanao.
Manipud Kadagiti Agdama a Kameng ti Bannawag: Dios ti Agngina!
Natalna iti tangatang ti naglugananmi nga eroplano. Apagbiitkami laeng iti Gensan. Imiankami iti Tacurong City, Sultan Kudarat. Nagderetsokami iti Siudad ti Davao.
Idi adddakami iti Davao public bus terminal, nagdamagak kadagiti konduktor ken drayber no mano nga oras ti biahe manipud Davao-Surigao del Norte ken Davao-Butuan City, Agusan del Norte. Napintas ti panawen ditoy. Adda Philtranco Bus a Davao-Manila. Ngem dua nga oras a mai-RoRo manipud Lipata Port, Surigao agingga iti Liloan Port, Southern Leyte. Ken natuok ti biahe. In-Google-ko ti 2GO Travel. Awan met ti biahe ti barkoda.
Walo nga orasmi iti Yellow Bus a naglugananmi a dimteng iti Butuan City. Nagturongkami iti Nasipit Port iti kabigatanna.
Ditoy, naammuak nga awan ti barko nga agpa-Manila. Ti laeng kakaisuna a RoRo ti mapan iti Cebu iti alas-sais ti sardam, ti M/V Starlite.
Nakaul-ulimek ti M/V Starlite. Dua laeng a truck ken awan pay duapulo ti pasaherona. Agkarga koma daytoy iti lima gasut. COVID-19 pandemic isu a nakirang ti pasahero.
Disiembre 13 ti agsapa idi makadanonkami ti Cebu. Limbesen ti alas siete idi maiduron ti tugboat ti M/V 2GO St. Francis Xavier nga impatengnga iti baybay. Nanglangeb ti langit. Nasurok a sangagasut ti pasaherona. Idinto ta 1,400 -1,500 ti gagangay. Daydi laeng met a nagsikko a dimmagas iti pasahero iti Tagbilaran Port (Bohol). Nagbayagkami sadiay iti lima nga oras. 22-24 nga oras ti gagangay a biahe ti Cebu-Manila.
Natalna pay laeng ti taaw iti nagmalem ti Disiembre 14.
“Maulawak. Kasla nagaraw unay ti barko,” kinuna ti asawak a nakakapet iti katre. Dua a double deck ti cabin-mi ngem dakami laeng ti pasahero ditoy.
“Kasta laeng ta nakaiddaka ngamin, “inyalay-ayko. Alas dies y media ti rabii.
Naglabas ti maysa nga oras. Ney, ket saanen nga ang-angaw! Nagkullayawak. Agsabsabuag ti narungsot a dalluyon. Agin-indayonen ti barko. Kumanabtuog a kasla makadungpar ti agsumbangir a bakrangna iti bakras ti bantay. Tulidennak payen a nakaidda. Uray la naguyas nga agsublisubli dagiti gargaretmi.
Bimmangonak a kimpet iti saka ti katre. Makaulaw a talagan. Idi laeng a mapadasak ti maulaw idinto ta saankon a mabilang ti panagluganko iti barko a mangsublisubli ti Visayas ken Mindanao. Imbolsak ti sultipko. Nangibabaak iti dua a lifevest.
Pinadpadaanak ti pakdaar ti kapitan ti barko nga ‘Abandon Ship’.
Kinitak ti Google Map. Addakami iti parte ti Romblon.
Brag! Brag! Nagsisio manen ti barko.
“Diosko! isalakannakami iti dakes ken disgrasia. Mapattog san ti barko!”
Napankami nagpaliiw iti ruar. Awan met ti maallingagmi a karibuso. Kimpetkami iti stainless railing. Awan uray maysa a pasahero wenno ship crew a pagdamaganmi. Simmiripak kadagiti sarming ti Island Fiesta Restaurant. Makabulsek ti sipnget.
Nag-picture-kami. Impatulod a dagus ni Mayleen iti Messenger dagiti tallo nga annakmi nupay putedputed ti signal. Nag-text, “Agsingsingpetkayo, annakko. Nakabutbuteng ‘toy 2GO. Matuang san.”
Simmangpetkami iti Pier Manila iti Disiemdre 15, alas siete ti agsapa. Naipadamag ti nakaro a namsaakan ni Bagyo Odette iti Isla ti Siargao, Isla ti Dinagat, Leyte, Samar ken Cebu. Adda sumagmamano a natay ken naruay dagiti nalayus a mula, pagtaengan ken resort.
Tunggal awisek ti asawak nga agbiahe iti ruar ti Luzon, agkedkeden ta mabuteng kanon nga aglugan iti barko. --O
Magatang ti Bannawag Magazine kadagiti kadagiti sukiyo a paggatangan.
Para iti subskripsion, ag-email iti [email protected] wenno kauman ni Boy Balanag iti CP Number 09162692390.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti dadduma pay a detalye, kontaken ti circulation department iti 8527-8121 Local 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/bannawag.magazine
Facebook Public Group: https://www.facebook.com/groups/1668855693563462.
Dios ti agngina.
Isip pabaknangen, Bannawag ti basaen!
