Intudingen ti Department of Justice (DOJ) a paayaban dagiti opisial ti Bureau of Plant Industry (BPI) tapno idatag dagitoy dagiti dokumento maipapan iti panagangkat iti sibuyas iti napalabas a dekada tapno marugianen a maimbestigar ti panagipuslit iti sibuyas.
Kinuna ni DOJ Secretary Jesus Crispin C. Remulla idi Huebes, Hulio 27, a mangrugin inton sumaruno a lawas ti imbestigasion nga imbilin ni Presidente Ferdinand Marcos Jr.
Segun ken ni Remulla, babaen ti pammilin ti Presidente, nangbukel ti DOJ iti Anti-Agricultural Smuggling Task Force ken maysa nga special team dagiti prosecutor a nakatalimudok iti pannakaprotektar ti entero a sektor ti agrikultura, a saan laeng nga iti industria ti sibuyas.
Karaman kas kameng ti task force ti Office of the Prosecutor General (OPG) nga idauluan ni Chief State Prosecutor Richard Fadullon ken ti National Bureau of Investigation (NBI) nga idauluan ni Director Medardo De Lemos.
Manipud Kadagiti Agdama a Kameng ti Bannawag: Dios ti Agngina!
Kinuna ni Remula a nabigbigdan dagiti maseknan a personalidad ket ipiladan dagiti kaso kontra kadagitoy iti kabiitan a panawen.
Impalgakna nga imbestigaren ti task force ti "aganay a 20 a tattao" iti panagpuslit ti sibuyas "ngem uppat laeng kadagitoy ti main player."
"Kontroladoda ti 80 a porsiento ti suplay ti sibuyas isu a kabalinanda a manipularen ti presio ti sibuyas no kaano a kayatda," kinuna pay ni Remulla.
Maipapan iti maipadpadamag a "reyna ti sibuyas," inlatak ni Remulla a kontrolado daytoy a "reyna" ti mapapati a 55 agingga iti 65 a porsiento ti sibubukel a suplay ti sibuyas.
Innayonna nga "adda dagiti kakomplot (ti 'reyna') iti entero a pagilian isu a makontrolda a talaga ti presio (ti sibuyas)." (JEFFREY DAMICOG/ Manila Bulletin)
