Aw-awisen ti Civil Service Commission (CSC) dagiti agtarigagay nga agserbi iti publiko inton Hulio 28 a kitaenda dagiti maidiaya a panggedan nga ipaay ti gobierno, agraman ti gobierno lokal ken para iti publiko a pagadalan wenno kolehio babaen ti CSC Job Portal.
Masarakan ti CSC Job Portal iti: www.csc.gov.ph/career.
"Tinawen, rinibribu nga aplikante ti maaw-awat iti publiko a sektor gapu kadagiti mabalin a panggedan a nakapaskil iti CSC Job Portal. Ita a tawen, awisenmi manen dagiti katturpos iti kolehio ken kadagiti agdadamo nga agsapul iti panggedan, agraman dagiti nakaruar iti Career Service Exams, ken dagiti kayatda ti umakar iti panggedan a mapanda iti portal," kinuna ni CSC Chairperson Karlo Nograles.
Dagiti interesado nga aplikante mabalinda a luktan ti CSC Job Portal ket mabalinda a biruken ti umisu a posision babaen kadagiti filter kas iti position title, plantilla item number, kasta met ti position title with the place of assignment, plantilla item number, application deadline, salary/job grade, ken dagiti nasken a kualipikasion para iti posision.
Manipud Kadagiti Agdama a Kameng ti Bannawag: Dios ti Agngina!
Pinalagipan ni Nograles dagiti aplikante a direkta nga ipatulod amin nga aplikasion ken saludsod maipapan iti bakante a posision iti maseknan nga ahensia.
Imbalakad ni Nograles kadagiti agbirbirok iti panggedan a panunotenda a naimbag dagiti kualipikasion ken paglaingan a kasapulan iti tunggal posision, ta saan laeng a dagiti elihibilidad ti kasapulan iti permanente a posision.
Maibasar iti CSC Resolution No. 2000221, a nayulog idi Pebrero 4, 2020, inwayat ti CSC ti maymaysa a wagas ti panakayalnag dagiti posision iti gobierno babaen ti CSC Website.
"Manginanamakami nga ad-adu pay a kualipikado a Filipino ti sumrek iti opisina ti gobierno ken agbalin a paset ti 1.8-milion a mangmangged iti gobierno tapno makatulongda iti pannakapasayaat ti pagilian," kinuna ni Nograles.
Dhel Nazario/Manila Bulletin
