Aganay nga 40,683 a pamilia wenno agdagup iti 180,373 nga indibidual ti naapektaran iti iduduprak ni Super Typhoon “Egay” iti Ilocos Sur idi Hulio 26-28, 2023, idinto nga 495 iti 768 a barangay ti probinsia ti apektado, segun iti kaudian (Hulio 31) a report ti Provincial Disaster Risk Reduction Management Office.
Pito a tao ti naireport a natay ken uppat ti nadangran. Walopulo ket siam met a balay ti nadadael ken 7,142 ti partially damaged.
Umabot iti 200 a pamilia ti pinasangbay ti gobierno probinsial iti Provincial Farmers Livelihood Development Center iti Siudad ti Vigan, a nagbalin a temporario nga evacuation center idi kapigsa ti bagyo.
Iti biang ti impraestruktura, aggatad iti PhP1,123,410,000 ti nadadael a kalsada, rangtay, kdp. kalpasan ti assessment ti Provincial Engineer’s Office, Department of Public Works and Highways (DPWH) ken kas maibatay kadagiti report manipud kadagiti nadumaduma nga ili ken siudad.
Ket Itartarayanmi Dagiti Bomba
Mapan met a PhP54,946,161 a gatad ti dingo (livestock) ti napukaw idinto a PhP142,420,575 iti agrikultura ken fisheries.
Nairaman a nadadael ti daan a Quirino Bridge a mamagsilpo iti umuna ken maikadua a distrito ti Ilocos Sur. Nayanud met ti dadduma a ramit ti “One Ilocos Sur Light Show” a naimontar iti nasao a rangtay.
Mabalin a ngumato pay ti gatad ti nadadael no mainayon dagiti sumangpet pay report dagiti local government unit.
Kabayatanna, nangted iti pakpakauna a PhP15 a milion ni Presidente Ferdinand Marcos Jr. para iti Ilocos Sur, sabali pay ti sag-PhP3 a milion para iti Vigan City ken Candon City ken PhP2 a milion para iti 32 nga ili tapno mausar para iti quick response.
Segun ken ni Gobernador Jeremias “Jerry” Singson, nagpakaammo metten ti opisina ni Bise Presidente Sara Duterte-Carpio ken dagiti opisina da Senador Bong Go, Senador Robin Padilla ken Senador Jinggoy Estrada a mangipatulodda iti nayon pay a tulong iti probinsia.
Nagyaman met ni Gobernador Singson iti Luzon Hydro Corporation, PCSO, PAGCOR, Peoples Republic of China Consulate iti Laoag City, ken kadagiti agduduma nga ahensia a dagus a nagipatulod iti kasapulan a food ken non-food assistance.
Inkari pay ti gobernador a mangipaay ti gobierno probinsial iti PhP10,000 iti tunggal maysa kadagiti nasurok a 3,000 nga apektado a micro small and medium enterprise. Nayawat metten ti sag-PhP10,000 iti pamilia dagiti pito a natay gapu iti bagyo.
Nangiruar met ti Sangguniang Panlalawigan (SP) nga idauluan ni Bise Gobernador Ryan Luis Singson iti SP Resolution a nangideklarar iti sibubukel a probinsia iti state of calamity. (Mancielito S. Tacadena)
