Dinutokan ni Presidente Ferdinand Marcos Jr. ni Deogracias Victor "DV" Savellano a kas undersecretary ti Department of Agriculture (DA) itay nabiit, segun iti pakaammo ti Presidential Communications Office (PCO).
Nagpaay ni Savellano, 63, a gobernador (2001-2004, 2007-2010) ken bise gobernador (1988-1992, 2010-2016) ti Ilocos Sur. Nagserbi pay a diputado ti umuna a distrito ti Ilocos Sur (2016-2022) ken nagbalin a deputy speaker ti Kamara (2019-2022). Nagkandidato manen iti napalabas a kongresional nga eleksion ngem saan a napagasatan.
Nayanak ni Savellano iti Cabugao, Ilocos Sur idi 1959 kada Victorino Savellano (dati a mayor ti Cabugao) ken Virginia Barbers. Tinurposna ti batchelor's degree-na iti economics iti University of the Philippines. Nagbasa pay iti Monterey, California, a nakagun-odanna iti master’s degree iti international business administration.
Kinuna ni House Minority Leader ken 4Ps Party-list Rep. Marcelino Libanan a mainugot unay ni Savellano a kas undersecreary ti DA.
Manipud Kadagiti Agdama a Kameng ti Bannawag: Dios ti Agngina!
“Addaan ni Congressman Savellano iti ekstensibo a padas a kas ehekutibo, isu kualipikado unay isuna," kinuna ni Libanan.
Pinundar da Savellano ken Libanan ti National Movement of Young Legislators (NMYL) idi 1992, idi agpadada a bise gobernador kadagiti probinsiada (Ilocos Sur ken Eastern Samar).
Malagip a kidkiddawen ni Libanan iti Presidente nga italek daytoy ti kinasekretario ti agrikultura iti sabali tapno maipamaysa ti Presidente ti obra daytoy a kas chief executive.
Ni Marcos ti agak-akem a sekretario ti DA sipud panangrugina nga agtakem a Presidente idi Hunio 30, 2022.
