Nangisayangkat ti lokal a gobierno ti Santa Teresita, Cagayan ken ti Bureau of Fisheries and Aquatic Resources (BFAR) Regional Office 2 ti Department of Agriculture (DA) iti dua-aldaw a seminar ken training iti panagtaraken ken panagpaadu iti tilapia para kadagiti fishpond operator ken agricultural technician.
Naangay ti seminar-training iti Municipal Agricultural Office ti nasao nga ili, babaen ti panangilungalong ti gobierno lokal nga idauluan ni Mayor Rodrigo P. De Gracia ken iti panangiwanwan ni BFAR Regional Director Angel B. Encarnacion.
Immatonan da BFAR Provincial Fisheries Officer Jennifer T. Tattao ken Municipal Agricultural Officer Edwin P. Madrid ti seminar-training.
Kinuna ni Ms. Felicitas Pareggua, trainor ti BFAR, kadagiti fishpond operator a masapul a pilienda a nasayaat dagiti pagbalinenda a breeder a tilapia ken inrekomendarna a nasaysayaat met laeng no iti BFAR ti pangalaanda.
Manipud Kadagiti Agdama a Kameng ti Bannawag: Dios ti Agngina!
Ingganetget met ni BFAR Fish Health Laboratory Staff Jerico D. Miguel a maysa a masapul nga ikonsiderar dagiti oparator a saan nga stock (wenno nabayagen a nailebben) ti feeds nga ipakan kagiti tilapia tapno maliklikan ti nutritional disease. "No malnourished dagiti ikan, maapektaran ti panagdakkelda, agkudiditda," kinuna ni Miguel. Innayonna pay a masapul a nadalus a kanayon ti fishpond tapno maliklikan dagiti sakit ti ikan a parnuayen ti fungus, bakteria, ken virus.
Segun ken ni Fisheries Livelihood Development Technician Zenaida Usigan, daytoy ti umuna a pannakaangay ti seminar-training kadagiti 15 fishpond operator ken agricultural technician ti Santa Teresita, iti agdama nga administrasion.
Sinuportaran met ni Bise Mayor Ruben P. Fagela Sr. ken dagiti miembro ti Sangguniang Bayan ti nasao nga aktibidad. (Edison B. Tobias)
