Inaprubaran itay nabiit ti House Committee on Suffrage and Electoral Reforms ti gakat a mangipalubos kadagiti overseas Filipino worker (OFW) nga online nga agbotos.
Panggep ti gakat, ti House Bill (HB) No.6770, nga amendaran ti Republic Act (RA) 9189 wenno Overseas Absentee Voting Act of 2003, nga inamendaran met ti RA 10590 wenno Overseas Voting Act of 2013.
No mapagbalin a kas linteg ti gakat, palubosan daytoy dagiti OFW ken dagiti marinero nga agbotos babaen ti Internet, ken makapagrehistro kas botante babaen ti elektroniko a wagas.
Iti bitla ni OFW Party-list Rep. Marissa Magsino, sponsor ken principal author ti HB No.6770, kinunana a ti panagbotos babaen ti Internet, paregtaenna ti ad-adu pay nga OFW a makipartisipar iti proseso ti eleksion.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Magsino a segun iti datos ti Commission on Elections (COMELEC), a 1.69 a milion laeng manipud iti aganay a 12 a milion a Filipino nga adda iti ballasiw-taaw ti nagrehistro nga agbotos iti 2022 nga eleksion presidensial. Agarup 600,000 wenno 38 a porsiento laeng met kadagitoy a nagrehistro ti aktual a nagbotos.
Nakagastos ti COMELEC iti PhP470 a milion para iti pannakaisayangkat ti panagbotos dagiti OFW iti kallabes nga eleksion. (ELLSON QUISMORIO/ Manila Bulletin)
