Indagadag ni ACT-CIS Party-list Rep. Erwin Tulfo ti panangadal ti Kamara no kasano a maipatungpal a naan-anay ti Republic Act (RA) No. 11861 wenno “Expanded Solo Parents Act."
Iti umuna a panagbitlana itay Agosto 1, dinakamat ni Tulfo a saan a maipatpatungpal ti Expanded Solo Parent Act kadagiti dadduma a gobierno lokal (LGU) ken establisimiento ti negosio.
"Naaramid daytoy napintas a paglintegan tapno matulongan dagiti agsolsolo a nagannak (solo parents) kadagiti pakarikutanda a mangpadakkel a bukbukodda kadagiti annakda. Ngem ania ti serserbi dayta a linteg no di met mapagnumaran dagiti agsolsolo a nagannak?" kinuna ni Tulfo.
Segun iti Expanded Solo Parents Act, maikkan iti PhP1,000 a binulan dagiti agsolsolo a nagannak, 10-porsiento a diskuento ken pannakailaksid iti value added tax iti espesipiko a produkto, automatiko a pananakasakup ti National Health Insurance Program, prioritisasion iti panagsapul iti panggedan ken proyekto iti panagpabalay ti gobierno, kas mayannurot iti sagudayen ti linteg.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Tulfo nga adu ti naawatna a report a di maipatpatungpal dagiti dadduma a sagudayen ti linteg gapu iti kinakurang ti pondo nangruna kadagiti nakurapay nga ili.
"Isu a kiddawek kadagiti kakaduak a subliantayo koma nga adalen daytoy a linteg, kangrunaanna ti saan a panangted dagiti LGU iti PhP1,000 a binulan nga alawans dagiti kualipikado a solo parents," kinuna ni Tulfo.
Mainaig itoy, indatag ni Tulfo ti House Resolution (HR) No. 1150 a mangkidkiddaw iti panagpalutpot no apay a di maipatpatungpal dagiti dadduma a sagudayen ti linteg.
(Ellson Quismorio/Manila Bulletin)
